Pages

15 September 2012

தண்ணீரில் மிதக்கும் மக்கள்... தவிக்க விட்ட ஜெ...


தண்ணீரில் மிதக்கும் மக்கள்... தவிக்க விட்ட ஜெ...

கூடங்குளத்தில் அச்ச அலை!

 கூடங்குளத்தில் அணுமின் நிலையத்துக்கான அடிக்கல் நாட்டி, அதற்கான வேலைகள் தொ​டங்கி 20 ஆண்டுகள் ஆகிவிட்டன. அப்போது, இதை எதிர்த்து முழக்கமிட்டவர்கள் சில நூறுபேர்தான். ஆனால், கடந்த 10 ஆண்டுகளாக தமிழகத்தில் சுற்றுச்சூழல் குறித்த ஆர்வம் அதிக மானதைத் தொடர்ந்து, போராட்டத்தில் அதிகம் பேர் ஈடுபடத் தொடங்கினர். திருப்பூர் சாயப் பட்டறைகள், கடலூர் கெமிக்கல் நிறுவனங்கள், திண்​டுக்கல் தோல் பதனிடும் தொழிற்சாலைகள் ஆகியவற்றோடு கூடங்குளமும் பேசப்படும் நிலைக்கு வந்தது.கூடங்குளத்தின் கடல் ஓரத்தில் நடந்துவந்த போராட்டத்தை, நாடு முழுவதும் பரவ வைத்தது மட்டும்தான் தமிழ்நாடு அரசாங்கத்தின் ஒரே சாதனை. 'ஈரைப் பேன் ஆக்கி பேனைப் பெருமாள் ஆக்குவது’ என்று கிராமத்தில் சொல்வார்கள். போலீஸ் கையில் அதிகாரத்தைக் கொடுத்தால், அமைதிப்படுத்துவதை விட தங்களது அதிகாரத்தை நிலைநாட்டுவதில் மட்டுமே குறியாக இருப்பார்கள் என்பது  ஆட்சியாளர்களுக்கு இன் னமும் தெரியாமல் இருப்பது, தமிழ்நாட்டின் துரதிர்ஷ்டம்!
கடந்த ஆண்டு, ஜப்பான் ஃபுகுஷிமாவில் அணு உலை வெடிப்பு காரணமாக உலகம் முழுவதும் அணு உலைகளுக்கு எதிரான பிரசாரங்கள் பெருகின. அது தமிழகத்திலும் பற்றிக்கொண்டது. இந்தியாவில் உள்ள அணு உலைகள் அனைத்தின் பாதுகாப்புக்கும் உத்தரவாதம் தரவேண்டிய நெருக்கடி, மத்திய அரசுக்கு ஏற்பட்டது. கூடங்குளம் மக்களைச் சந்தித்து அவர்களது பீதியை அதிகப்படுத்தும் அளவிலான வகுப்புகளை அணுமின் நிறுவனத்தைச் சேர்ந்தவர்கள் எடுக்க ஆரம்பித்தார்கள்.
'அணு உலை வெடிச்சா, நீங்க என்ன பண்ணணும் தெரியுமா? முகத்தை மூடிக்கிட்டு மூணு கிலோ மீட்டர் தூரத்துக்கு ஓடணும்’ என்று தொடங்கி 'ஆறு மாதங்களுக்கு ஊருக்குள் நீங்கள் வரக்கூடாது’ என்பது வரை வார்த்தைகளால் ரத்தத்தை உறைய வைத்தனர். தாங்கள், சாவுக்குப் பக்கத்தில் இருக்கிறோம் என்பதை கூடங்குளம் மக்கள் உணர ஆரம்பித்தனர். அப்போதுதான், 'கூடங்குளம் அணுஉலை எதிர்ப்பு இயக்கம்’ என்ற அமைப்பைச் சேர்ந்த இளைஞர்கள் தெருமுனைப் பிரசாரம் செய்யத் தொடங்கினனர். மாதத்துக்கு ஒரு கிராமத்தில் உண்ணாவிரதம் என்று ஆரம்பித்தார்கள். ஆண்கள் அனைவரும் மீன் பிடிக்க கடலுக்குச் சென்றுவிட, பெண்கள் மட்டும் இதில் கலந்துகொள்வது என்று முடிவானது. முதலில் கூடங்குளம்... அடுத்து இடிந்தகரை... கூத்தங்குழி... பெருமணல்... வைராவிக் கிணறு... கூடுதாழை... செட்டிக்குளம் என்று பரவியது. மாதத்துக்கு ஓர் ஊர் என்று இருந்ததை, தொடர் உண்ணாவிரதமாக மாற்றினர். இடிந்தகரையில் பந்தல் போட்டு 127 பேர் உட்கார்ந்தனர். அணு உலையை எதிர்க்கும் அமைப்புகளும் வைகோ உள்ளிட்ட ஒருசில அரசியல் தலைவர்கள் மட்டுமே ஆதரித்த நேரத்தில்... இதற்கான எண்ணெய் வார்த்தவர் முதல்வர் ஜெயலலிதா.
உள்ளாட்சித் தேர்தல் நேரத்தில் தூத்துக்குடியில் பேசிய அவர், 'உங்களில் ஒருத்தியாக நான் அங்கேயே வந்து போராடத் தயார்’ என்ற அவருடைய அறிக்கைதான், கூடங்குளம் மக்களுக்கு உற்சாகத்தைக் கொடுத்து போராட்ட ஆர்வத்தைத் தூண்டியது. 'மக்களின் அச்சத்தைக் களைந்த பிறகுதான் அணு உலைப் பணிகளைத் தொடர வேண்டும்’ என்றும் முதல்வர் ஜெயலலிதா அறிவித்தார். போராட் டக்காரர்களை அழைத்துப் பேசினார். அதையே அமைச்சரவைத் தீர்மானமாகவும் ஆக்கினார். டெல்லிப் பயணங்கள் ஏற்பாடு செய்யப்​பட்டன. சங்கரன்கோவில் இடைத்தேர்தல் முடிந்ததும், கூடங்குளம் அணுமின் நிலையத்தை உடனே திறப்பதற்கான நடவடிக்கைகளை எடுக்க வேண்டும் என்று மத்திய அரசாங்கத்துக்கு முதல்வர் கோரிக்கை வைத்தார். 'அணுஉலை ஆபத்தானது. நான் உங்களோடு சேர்ந்து போராடுவேன்’ என்று அறிவித்த அவர், 'அணு உலையைத் திறக்க வேண்டும்’ என்று உத்தரவிடும் போதாவது கூடங்குளம், இடிந்தகரை பகுதி மக்களை நேரில் அழைத்து மனமாற்றம் செய்திருக்க வேண்டும். அல்லது அந்தப் பகுதிக்குச் சென்று மக்களைச் சந்தித்து இருக்க வேண்டும்.
ஓர் ஆண்டு காலமாக கூடங்குளத்தைச் சுற்றி இருக்கும் சுமார் 25 கிராமங்களைச் சேர்ந்த மக்கள் உண்ணாவிரதம் இருப்பது, ஓர் அரசாங்கம் சமாதா னப்படுத்தும் பிரச்னையாகத் தெரியவில்லையா? முதல்வர் செல்லவில்லை... இன்று முதல்வருக்கு அடுத்த நிலை முக்கியஸ்தர்களாகச் சொல்லப்படும் ஓ.பன்னீர்செல்வம், நத்தம் விஸ்வநாதன் அகியோராவது சென்றார்களா? தமிழ்நாட்டின் தலைமைச் செயலாளராக இருக்கும் தேபேந்திரநாத் சாரங்கிக்கு கூடங்குளம் எந்தத் திசையில் இருக்கிறது என்பது தெரியுமா? சட்டம் ஒழுங்கையும் உளவுத் துறையையும் ஒருசேரக் கவனிக்கும் டி.ஜி.பி. ராமானுஜம் ஒரு முறையாவது அந்தப் பகுதிக்குப் போய் வந்திருப்பாரா? அந்த மக்களைச் சந்தித்து இருப்பாரா? அவருடைய போலீஸ் வாழ்க்கை ஸ்ரீவைகுண்டம் வட்டாரத்தில்தான் ஆரம்பித்தது. அந்தப் பாசமாவது இருந்திருக்க வேண்டாமா? காதி கிராமத் துறை அமைச்சர் செந்தூர்பாண்டியன் ஒரே ஒரு முறை உண்ணாவிரதப் பந்தலுக்குச் சென்றார். உதயகுமாரனும் புஷ்பராயனும் கேட்கும் எந்தக் கேள்விக்கும் பதில் சொல்லத் தெரியாதது மட்டுமல்ல... அந்தக் கேள்வியைக்கூட உள்வாங்கிக்கொள்ள செந்தூர்பாண்டியனால் முடியவில்லை. தமிழக அரசாங்கம் அமைத்த குழுவினராவது அந்த உண் ணாவிரதப் பந்தலுக்குப் போனார்களா? அணு உலையை மட்டும் பார்த்துவிட்டுத் திரும்பினார்கள்.

இப்படி எந்த முயற்சியும் எடுக்காத முதல்வர் ஜெயலலிதா, விவகாரத்தை அடக்குவதற்குத் தேர்ந் தெடுத்த நபர் ராஜேஸ் தாஸ். தென் மண்டல ஐ.ஜி. கேரளாவுக்கு எதிராக முல்லைப் பெரியாறு அணையைக் காப்பாற்ற ஆர்ப்பாட்டங்களை நடத்திய தேனி, பெரியகுளம் மக்களைப் பார்த்து, கோப வார்த்தைகளைச் சொல்லிச் சீண்டிவிட்டு, அடிதடிக் கலவரமாக அந்தப் போராட்டத்தை மாற்றியவர். ஒரு 
ஜான் பாண்டியனுக்கு பாதுகாப்பு கொடுத்து, அவரைப் பத்திரமாகக் கொண்டுபோய் சேர்க்கத் தெரியாமல்... தடுத்து... துப்பாக்கிச் சூடு நடத்தி ஆறு பேர் கொலையான சம்பவமும் இவரது காலத்தில்தான். இப்போது, அவருக்குக் கூடங்குளம் அசைன்மென்ட். 'ஒழுங்கா இருங்க... இல்லைன்னா உதயகுமாரைத் தூக்கிடுவேன்’ என்று, எந்தப் போலீஸ் அதிகாரியாவது, கொந்தளித்து இருக்கும் மக்கள் முன்னால் சொல்வாரா? ஐ.ஜி. ஓர் இடத்தில் இருந்தாலே, கீழே உள்ள போலீஸ்காரர்கள் துணிச்சலாக அடிக்க ஆரம்பிப்பார்கள் என்பது தெரிந்த விஷயம்தானே. ஊருக்குள் அமைதியான முறையில் உண்ணாவிரதம் இருந்தவர்களை சமாதானப்படுத்துவதற்கான எந்த முயற்சியும் எடுக்காமல்... அவர்களைக் கடலுக்குள் விரட்டிவிட்டு... அவர்களுக்கு ஆதரவாக சென்னை தொடங்கி எல்லா இடங்களிலும் போராட்டத்தைப் பரவவிட்டு... அதன்பிறகு, 'மீனவர்கள் மாய வலைகளுக்குள் சிக்க வேண்டாம்’ என்று அறிக்கை விடுவதுதான் ஒரு முதலமைச்சரின் விரைந்து முடிவெடுக்கும் திறனா?

இது ஏதோ ஜெயலலிதாவின் சொந்தப் பிரச்னை என்பது மாதிரி, மத்திய காங்கிரஸ் அரசாங்கம் தன் வாய், கண், காது மூன்றையும் மூடிக்கொண்டு விட்டது. உண்ணாவிரதம் இருப்பதும் போராட்டம் நடத்துவதும் மாநில அரசாங்கம் சம்பந்தப்பட்ட சட்டம் ஒழுங்குப் பிரச்னையாக இருக்கலாம். ஆனால், அந்த மக்கள் கிளப்பும் சந்தேகங்கள் அனைத்துக்கும் பதில் சொல்லக் கடமைப்பட்டது மத்திய அரசாங்கம்தான். அவர்கள் அமைத்த விசாரணைக் குழுவினரும் உண்ணாவிரதப் பந்தலுக்கு வரவில்லை. அமைச்சர் நாராயணசாமி மட்டும் தெரியாத்தனமாக ஒரு முறை வந்தார். அவரால் எந்தப் பதிலும் சொல்ல முடியவில்லை. 'அணு உலை பாதுகாப்பானது என்றால், உங்கள் மாநிலத்தில் கொண்டுபோய் வைத்துக்கொள்ளுங்கள். உங்களுக்கும்தான் கடல் இருக்கே’ என்று, மக்கள் கிண்டல் செய்ததைப் பார்த்து நொந்துபோய், 'மக்களின் உணர்வுக்கு மதிப்புக் கொடுக்கிறேன்’ என்று சொல்லி விட்டுப் போனார். தமிழகத்தை டெல்லியில் பிரதிபலிக்கக்கூடிய ப.சிதம்பரம், ஜி.கே.வாசன் போன்றவர்கள் மக்களை மனமாற்றம் செய்ய வரவில்லை. தமிழ்நாடு காங்கிரஸ் கட்சித் தலைவர்கள் டி.வி.க்களில்களில் மட்டுமே பேசினர். 'இரண்டு வாரத்தில் அணுஉலை செயல்படத் தொடங்கும்’ என்பதைச் சொன்னாலே அணுஉலை செயல்பட ஆரம்பித்து விடும் என்று மத்திய அரசு மௌனமாக இருந்தது. இப்போதுகூட அது ஜெயலலிதாவின் சுமை என்ற அலட்சியம்தான் டெல்லி காங்கிரஸ் தலைகளுக்கு இருக்கிறது.
பிள்ளையைக் கிள்ளிவிட்டு தொட்டிலை ஆட்டிவிடுவதில் கை தேர்ந்த கருணாநிதி, இப்போது புதிய புத்தராகப் பரிமாணம் பெற்றுள்ளார். 'மத்திய, மாநில அரசுகள் போராட்டக் குழுவி​னரிடம் பேசி ஆபத்து ஏற்படாது என உத்தரவாதம் தர வேண்டும். காவல்துறையை வைத்துக்கொண்டு போராட்டத்தை ஒடுக்க ஜெயலலிதா கருதிவிடக் கூடாது’ என்று உபதேசம் செய்துள்ளார். இந்த விவகாரத்தில் கருத்தே சொல்லாமல் இருந்த கருணாநிதி, திடீரென கடந்த பிப்ரவரி மாதம், 'கையில் வெண்ணையை வைத்துக்கொண்டு ஏன் அலைய வேண்டும். கூடங்குளத்தை செயல்பட விடாமல் ஏன் வைத்துள்ளீர்கள்? போராட்டக்காரர்களுடன் ஏன் முதல்வர் பேசுகிறார்? அவர்களை இவரே தூண்டி விடுகிறாரா?’ என்று பேசியதன் மூலமாகத்​தான் ஜெயலலிதா சினம்கொண்டு... உடனே நடவடிக்​கைகளில் இறங்கினார். யாரோ போட்ட உத்தரவுக்காக அன்று தூண்டிவிட்ட கருணாநிதி... இன்று அப்படியே மாற்றிப் பேசுவது எத்தகைய நாடகம். 'கூடங்குளம் பிரச்னை ஒன்று போதும், தென் மாவட்டத்தில் நாம் ஜெயிக்க!’ என்று இப்போதே சில  தி.மு.க. பிரமுகர்கள் பேச ஆரம்பித்து விட்டார்களாம். அந்த அளவுக்கு அரசியல் கொக்குகள் மீன்களுக்காகக் கரையில் காத்திருக்கின்றன.
இந்தச் சூழ்நிலையில், மற்றவர்களைவிட ஜெய லலிதாவுக்குத்தான் பொறுப்பு அதிகம் உள்ளது. மத்திய அரசாங்கம், இந்தியாவில் உள்ள அணு உலைகளை ஆய்வு செய்து அறிக்கை கொடுக்கச் சொன்னது. அதன்படி அமைக்கப்பட்ட குழு 11 விதிமுறைகளைக் கொடுத்தது. அதில் இதுவரை 6 மட்டுமே கூடங்குளத்தில் நிறைவேற்றப்பட்டுள்ளன. அவற்றை நிறைவேற்ற மத்திய அரசை வலியுறுத்தவும் அதை விளக்கி கூடங்குளம் மக்களிடம் மனமாற்றம் செய்யவும் ஜெயலலிதா முயற்சிக்க வேண்டும். அந்த மக்களிடம் அவர் பேச வேண்டும். அப்போதுதான் தென் மண்டலம் அமைதியாகும்.
ஜெ. நினைத்தால் அமைதிப்படுத்தலாம். ராஜேஸ் தாஸ்களால் நிச்சயம் முடியாது!
ப.திருமாவேலன்
படங்கள்: எல்.ராஜேந்திரன்,
ஏ.சிதம்பரம், ரா.ராம்குமார்

6 June 2012

கற்றது கைமண் அளவு- 06/06/2012

இருவர்:

Diamond Jubilee state procession


இங்கிலாந்து இராணி பதவியேற்று 60 ஆண்டுகள் நிறைவடைந்ததை கொண்டாடும் விதமாக பிரிட்டன் முழுவதும் சென்ற வாரத்தின் நான்கு நாட்கள் விடுமுறை.மழையும் வெயிலும் கலந்து கட்டி அடித்தது. மழையையும் பொருட்படுத்தாது மக்கள் வெள்ளமென பக்கிங்காம் அரண்மனை முன்பு குவிந்திருந்து இராணிக்கு வாழ்த்துச் சொன்னார்கள். பிரிட்டன் முழுவதும் பார்ட்டி, கொண்டாட்டம் என்று திருவிழா போல அமர்க்களப்பட்டது. அம்மையாரின் வயது 86. இன்னமும் பிரிட்டனுக்காக வெளிநாட்டுப் பயணமும் கைகுலுக்கள் என்று சிம்மாசனத்தை அலங்கரிக்கிறார். அரசியல்வாதிகளும் அரச குடும்பத்தைக் கொண்டு சாதித்துக் கொண்டது தான் அதிகம். இந்தத் தள்ளாத வயதிலும் தனது நிலையில் இருந்து விலகி வாரிசுக்கு இடம் கொடுக்க மனமில்லையா இல்லை அரசியல் காரணங்களா என்று தெரியவில்லை. இளவரசர் சார்லஸ் தான் பாவம். அண்ணன் எப்போ சாவான் திண்ணை எப்போ காலியாகும் என்று இலவு காக்கிறார். இந்த இராணிக்கு எந்த விதத்திலும் குறைந்தவரில்லை நமது 89 வயது இளைஞர் கலைஞர் அவர்கள். குடும்பதில் உள்ள குளறுபடியாலும், உட்கட்சி அரசியலாலும் இவருக்கும் ஓய்வில்லை. தன் வாழ்நாள் முழுவதும் முக்கால்வாசி சுயநலத்தோடும் கால்வாசி பொதுநலத்துடன் (இது கூட அளவு குறையுமே ஒழிய கூடுவதற்கான வாய்ப்பே இல்லை) இருந்து தன் வாழ்வின் கடைசி காலத்தைக் கூட நிம்மதியாக கழிக்க முடியாமல் வாரிசுகளின் சண்டை, மகளின் ஊழல் வழக்கு, என்று குடும்பத்து பிரச்சனைகளை முன்னிறுத்தி/பின்னிறுத்தியே அரசியல் செய்ய வேண்டிய கட்டாயம் வேறு. இவரை நம்பி காத்திருக்கும் ஸ்டாலினுக்கும் கதியில்லை. 

++++++++++++++++++++++++++++++++++++++++++++++++++++++++++++++++++++++++++++++++++++++++++++++++
இரு வெற்றி:

                                               
ஐ.பி.எல். கல்கத்தா அணி வெற்றி பெற்றதைக் கொண்டாட அம்மாநில முதல்வர் பெரிய விருந்து படாடோபம் என்று அசத்தி இருக்கிறார். ஒரு சாதாரண ஒரு லோக்கல் கிரிக்கெட்டிற்கு எதற்கு இவ்வளவு முக்கியத்துவம் கொடுக்கிறார் ஒரு மாநில முதல்வர். கிரிக்கெட்டில் ஆர்வம் உள்ளவராக தன்னை முன்னிறுத்தும் போது இன்று சிறுவர்களாக ( அதாவது ஓட்டு போடும் வயதினை அடையாத)உள்ளவர்கள் வளரும் போது ஒரு சிறிய மாற்றத்தினை அவர்கள் மனதில் விதைக்க மேலும் தான் நடப்பு விசயங்களில் கவனத்தோடு இருக்கிறேன் என்று சொல்ல அல்லது மக்களின் கவனத்தை திருப்ப என்று எவ்வளவோ இருக்கும் என்று நினைக்கிறேன்.

                                               
ஆனந்த் மேலும் ஒரு உலக சாம்பியன் பட்டம் பெற்றிருக்கிறார். மிகவும் மகிழ்வாக இருக்கிறது. எனக்கெல்லாம் செஸ் பற்றி ஏதாவது கொஞ்சம் தெரியும் எனில் அதற்கு முழுக் காரணமும் அவர் மட்டும் தான். இது போன்ற வெற்றிகள் பலரின் மனதில் புதிய மாறுதலைக் கொண்டுவரும். தமிழக அரசும் சதுரங்கம் பாடத்திட்டத்தில் சேர்க்கப்படும் என்று அறிவித்ததுள்ளது. இந்தத் திட்டம் சரியான முறையில் அமல்படுத்தப்படும் போது திறமையான நல்ல பல சதுரங்க வீரர்களை அடையாளம் காண இயலும்.

++++++++++++++++++++++++++++++++++++++++++++++++++++++++++++++++++++++++++++++++++++++++++++++++


இருவிழா:

கமல் கலந்து கொண்ட இரு விழாக்களில் ஒன்றில் அவரின் பேச்சும் மற்றதில் வைரமுத்து அவர்களின் பேச்சும் ஹைலைட். கமல் கலந்து கொண்ட இளையராஜாவின் புத்தக வெளியீட்டு விழாவில் 'நான் மட்டும் இசையமைப்பாளராக இருந்திருந்தால் இளையராஜாவை தலையணையில் அழுத்திக் கொன்றிருப்பேன். அவர் மீது அவ்வளவு பொறாமை எனக்கு' என்றதும்; மறைந்த கவிஞர் கண்ணதாசனின் பேரன் ஆதவ் கண்ணதாசன் அறிமுகமாகும், 'பொன்மாலைப் பொழுது' என்ற படத்தின் பாடல்கள் வெளியீட்டு விழாவில் 'எம்.ஜி.ஆர், சிவாஜி இரண்டு பேரும் சிறு வயது கமல்ஹாசனை தூக்கி சுமந்திருக்கிறார்கள். அவர்களை சுமக்க வைத்த பாவம் கமல்ஹாசனை சும்மா விடுமா? அதனால்தான் இப்போது அவர் கதாநாயகிகளைத் தூக்கிச் சுமக்கிறார். இன்னும் பல காலம் இதை அவர் செய்து கொண்டே இருக்கட்டும்' என கவிஞர் வைரமுத்து கூறியதும் தான் இந்த இரு விழாக்களின் சிறப்பு. மேலும் ஒரு சிறப்பு இந்தப் புகழாரங்களுக்கும் விழாக்களுக்கும் எந்த ஒரு தொடர்பும் இல்லை என்பது தான்.

++++++++++++++++++++++++++++++++++++++++++++++++++++++++++++++++++++++++++++++++++++++++++++++++


இரு துயரங்கள்:

2012 லண்டன் ஓலிம்பிக் போட்டியில் கலந்து கொள்ள உள்ள இந்திய வீரர்களுக்கான பயிற்சி முகாமில், அழுகிய பழத்தில் தயாரித்த ஜூஸ் மற்றும் அசுத்தமான சமையல் அறைகளில் சமைத்த உணவுகள் வழங்கப்படுவதாக, முன்னாள் இந்திய நீச்சல் வீரர் கஜான் சிங் குற்றச்சாட்டி உள்ளார். என்னவொரு கொடுமையான சம்பவம். இந்த லட்சணத்தில் பதக்கம் எங்கேயிருந்து வாங்குறது. ஏதாவது அண்ணாச்சி கடையில் வெங்கலக் கிண்ணம் தான் வாங்கியார முடியும்.....

விவசாயி ஒருவர் நகை, பணத்திற்காக தனது நண்பரையும், அவரது மகள் மற்றும் மருமகனையும் கொன்று புதைத்தார். இந்தத் தகவலை அந்த விவசாயியின் மகள், டிவி டாக் ஷோ ஒன்றில் அம்பலப்படுத்தினார். இதையடுத்து போலீஸார் சம்பவ இடத்திற்கு விரைந்து சென்று மூன்று பேரின் எலும்புக் கூடுகளையும் தோண்டி எடுத்தனர். அந்த மகளையும் உறவுக்கு அழைத்தார் என்று வேறு அந்தப் பெண் கூறியிருக்கிறார்.

++++++++++++++++++++++++++++++++++++++++++++++++++++++++++++++++++++++++++++++++++++++++++++++++
மனதை மயக்கும் இசைஞானியின் பாடல். என்றும் இளமை.....

++++++++++++++++++++++++++++++++++++++++++++++++++++++++++++++++++++++++++++++++++++++++++++++++
இங்கிலாந்து மகாராணியின் பாராளுமன்ற வைர விழா சிறப்பு உரை.



++++++++++++++++++++++++++++++++++++++++++++++++++++++++++++++++++++++++++++++++++++++++++++++++

3 June 2012

இடப்பெயர்ச்சி


இடப்பெயர்ச்சி அல்லது இடமாற்றம் என்பது அவ்வளவு எளிதாக முடியும் காரியமில்லை. பழகிய இடத்தினை மனிதர்களை விட்டுப் பிரிவது என்பது மிகவும் துயரம் என்றால் புதிய இடத்தில் நாம் சென்று நம்மைச் சூழலுக்கு ஏற்றார் போல பொருத்திக் கொள்வது என்பதுவும் ஒரு சிரமமான் செயல் தான். காலச்சுழற்சியில் இடமாற்றம் என்பது ஒரு இன்றியமையாத ஒன்றாக ஆகிவிடுகிறது. பிறந்து வளர்ந்த மண்ணை, வீட்டை, நாட்டை, மனிதர்களை விட்டுப் பிரிவது துன்பம் மட்டுமல்ல அது பெரும் வலி. உணர்ந்தால மட்டும் தான் அந்த வலியின் கொடூரம் உறைக்கும். மதுரையை விட்டு கோவை வந்தபோதே எனக்கு மிகுந்த சிரமமாக இருந்தது. பத்து வருடங்களுக்கும் மேல் வாழ்ந்த கோவையை விட்டு தென்கொரியா சென்ற போதும் மிகுந்த துயரமாகத்தான் உணர்ந்தேன். பின்னர் மாற்றம் என்பது இயல்பான ஒரு நிகழ்வாய் எனக்குப் பழகிப் போனது. வாடகைக்கு இருக்கும் வீடுகளின் மேல் பற்று எல்லாம் இருக்காது. அந்த வீட்டோடு உணர்வுப் பூர்வமாக ஒன்றவே மாட்டேன். அது ஒரு புகலிடம் போன்று பற்றற்று வெகு தூரம் செல்லும் பறவை இளைப்பாறும் ஒரு மரத்தின் கிளை போலத்தான் எனக்கும் வீடுகளுக்குமான தொடர்பு கடந்த ஐந்து ஆறு வருடங்களில் இருந்து வந்துள்ளது. எதார்த்தத்தின் நிதர்சனம் எனக்குத் தெரியும் என்பதால் வீடுகளைச் சுமந்து செல்வதில்லை, அவற்றின் சுகமான நினைவுகள் மட்டும் என் நினைவுப் பெட்டிக்குள் சேமிக்கப் பட்டு விடும். பிரிட்டன் வந்தபோது என் மனைவியும் மகளும் என்னோடு வரவில்லை. ஒரு வருட தாமத்திற்குப் பின்னர் தான் என்னுடன் வந்திணைந்தனர். அந்த ஒரு வருடத்தில் என் முகவரி ஆறு இடங்களுக்கு மாறி இருந்தது. தனியாக, நண்பர்களுடன், ஒருவரின் வீட்டில் ஒர் அறையில் என்று என் கூடுகள் மாறிக் கொண்டே இருந்திருக்கிறது. எனக்கு மட்டும் சலிப்பாக இருந்ததே இல்லை இன்றுவரையிலும். 

திருமணம் ஆன நாளிலிருந்து என் மனைவி என்னோடு தேசாந்திரியாய் ஒவ்வொரு தேசமாகச் சுற்றும் வரத்தினைப் பெற்றார். அவருக்கு எப்போதும் இடப்பெயர்ச்சி என்பது மிகவும் எளிதான ஒரு செயலாகவே இருந்து வந்துள்ளது நேற்று வரை. இன்றிலிருந்து லஃபரா விட்டு எடின்பரா வர வேண்டும். இம்முறை இடமாற்றத்தை அவரால் எளிதாக எடுத்துக் கொள்ள முடியவில்லை. லஃபரா அவருக்கு கோவைக்கு அடுத்த தாய்வீடு போல ஆகிவிட்டது தான் காரணம். யாருடனும் அவ்வளவு எளிதில் பழகக் கூடிய சுபாவமுள்ளவர் இல்லை என் மனைவி. நண்பர்களை தெரிவு செய்ய சில காலம் பிடிக்கும் அவருக்கு. என் மகளின் சுபாவம் அப்படியே நேரெதிர். அவளுக்கு நண்பர்கள் ஏராளம். எனவே என் மனைவிக்கு, மகளின் நண்பர்களுடன் பழகியே ஆகவேண்டிய கட்டாயம் வேறு. எனவே குடும்ப நண்பர்களின் எண்ணிக்கையும் அதிகமானது. அடிக்கடி நிகழும் சந்திப்புகளும் அவரை சமூக அளவிலும் மாற்றி இருப்பதை என்னால் கடந்த ஒரு வாரத்தில் காண முடிந்தது. இடைவிடாத அழைப்புகள், நண்பர்களின் வருகை, நாங்கள் நண்பர்களின் வீடுகளுக்குச் செல்வது என்று நிற்க நேரமின்றி ஓடிக் கொண்டே இருந்தார். லஃபரோ அவரை சமூக அளவிலும், தன்னளவிலும் மிகவும் மாற்றிவிட்டிருக்கிறது என்பதனை என்னால் உணர முடிந்தது. 

எப்போதும் இடமாற்றத்தில் என் பங்கு தான் அதிகம் இருக்கும். எல்லாம் ஒருங்கிணைத்து வேறு இடம் செல்வது என்பதுவும் கூட ஒரு கலை தான். சரியாக திட்டமிட வில்லை எனில் கடைசி நிமிட மன நெருக்கடிக்களுக்கு ஆளாக வேண்டியிருக்கும். இந்த முறை என் பங்கு என்பது மிகவும் சொற்பம் தான். எடின்பராவில் வீடு பார்த்தது மட்டும் தான் என் வேலையாக இருந்தது. அதுவும் என் மனைவி பெரும்பாலும் இணையத்தில் தேடிய வீடுகளின் முகவரி தேடி நானும் என் நண்பரும் சென்று வீட்டினைப் பார்த்து புகைப் படம் எடுத்து அனுப்புவது தான் என் வேலை. என்மனைவிக்கு லஃபரோவில் இருப்பது போன்ற வீடு பார்த்து விட வேண்டும் என்பது தான் முதல் குறிக்கோளாக இருந்தது. லஃபரோவில் நாங்கள் இருப்பது ஒரு தனி வீடு முன்னே தோட்டம், வீட்டின் பின்னர் ஒரு அழகான தோட்டம் ஒன்றும் இருக்கும். வீட்டின் பின்புறம் தக்காளி, கேரட், பீன்ஸ் என்று ஒரு சிறிய காய்கறித் தோட்டம் மற்றும் ரோஜாவில் பெரும்பான்மையான சிகப்பு, மஞ்சள், வெள்ளை நிறங்கள் என்று எல்லாச் செடிகளும் வளர்த்துப் பராமரித்து வேறு வந்தார். எனவே கிட்டத்தட்ட இது போன்ற ஒரு வீடு பார்ப்பதே அவரின் குறிக்கோளாக இருந்தது. ஆனால் அதற்கு வாய்ப்பில்லை என்பதனை சில வீடுகளின் படங்களைப் பார்த்தே ஒரு முடிவுக்கு வந்திருப்பார் என்று நினைக்கிறேன். பின்னர் கொஞ்சம் விதிமுறைகளைத் தளர்த்திக் கொண்டு வீட்டினைப் பார்ப்பார். நாங்கள் இப்போது போகும் வீடு நான் கூட சென்று பார்க்கவில்லை. என் நண்பர் எடுத்த புகைப் படங்களிலும் அவர் மிகவும் கெஞ்சி என் மனைவியிடம் ' இங்க பாருங்க சகோதரி இதுக்கு மேல இங்க வீடு இல்ல. எல்லா வீட்டையும் பார்த்தாச்சு. எல்லா வீட்டு ஏஜென்டுகளும் எனக்கு நண்பராகிட்டாங்க, பாவம் இந்தப் பய ரொம்ப கஷ்டப்படுறான்னு நினைப்பாங்களோ என்னவோ, ஏதாவது புது வீடு வந்தா முதல்ல எனக்குச் சொல்லிட்டுத்தான் அப்புறமா வெளம்பரமே செய்யுறாங்க' என்கிற ரீதியில் அவர் சொல்லி என் மனைவியை எடின் பரா வரச் சொல்லி பார்த்து அவருக்குப் பிடித்துப் போன ஒரு வீடு. வீடு எடுத்து ஒரு மாசம் முடிந்து விட்டது. நான் ஒரு ஆராய்ச்சி எலி போல தங்கியிருந்து எனக்குப் பிடிச்சிருக்கு என்றவுடன் இப்போது இந்த இடமாற்றம் நிகழ்கிறது. வீடு மாற்றல் கூட முழுவதும் என் மனைவியே செய்ததுவும் இந்த முறைதான். அவரின் தனித்தன்மை எந்த இடையூறும் இன்றி வெளிப்பட்டதை என்னால் கண்கூடக் காண முடிந்தது. பழைய வீட்டின் அனைத்துக் கணக்குகளையும் முடித்து எல்லாப் பொருட்களையும் இடமாற்றம் செய்ய ஆட்களை ஏற்பாடு செய்வது வரை அவரே எல்லாம் செய்தார். என் உதவி அவர் கேட்ட பணத்தினைக் கொடுத்தது மட்டும் தான். இன்றுமுதல் புதிய வீடு, புதிய மனிதர்கள், குறிப்பாக என் மகளுக்கு புதிய பள்ளி என்று எல்லாம் புதிதாக இருக்கும். என் மகள் தான் என்னிடம் 'ஏம்ப்பா எல்லாத்தையும் அம்மா அனுப்புறாங்க' என்று தொடர்ந்து வேறுவேறு வார்த்தைகளில் என்னிடம் வேறு பதில் எதிர்பாத்தோ என்னவோ கேட்டுக் கொண்டேயிருந்தாள். பிடுங்கி நடப்படும் நாற்று தான் வளமாக உறுதியாக வளரும் என்றாலும் என்மகளின் ஊர் என்று எதனைச் சொல்வாள், இதுவரை சில மாதங்கள் மட்டுமே இருந்த என் கிராமத்தையா, இல்லை அவள் வளரவளர நாங்கள் மாறிக் கொண்டே இருக்கும் ஊர்களையா. சிறுவயது நினைவுகளும் அனுபவங்களும் இன்னும் சில வருடங்கள் கழித்து அவளின் பால்ய நினைவுகள் எந்த ஊரை அவளுக்கு நினைவூட்டும் என்கிற கவலைகள் என் மனதினை செல்லரிப்பதைப் போன்று அரித்துக் கொண்டே இருக்கிறது. இவளுக்காகவேனும் ஓரிடத்தில் இருக்கவேண்டும் என்கிற எண்ணம் எனக்குள் வலுப்பெற்றுக் கொண்டே இருக்கிறது......


2 June 2012

தமிழ் உணர்வாளர்களுக்கு நம்பிக்கை ஒளி

சார்லஸ் டெய்லருக்கு 50 ஆண்டுகள்..



போர்க்குற்றம் என்றதும் தமிழர்களின் நினைவுக்கு  முதலில் வருவது மகிந்த ராஜபக்சேதான். அவர் எப்போது தண்டிக்கப்படுவார் என்றுதான் தமிழர்கள் ஆவலுடன் காத்துக் கிடக்கிறார்கள். தமிழர்களுக்கு நம்பிக்கை ஊட்டும் வகை​யில் ஒரு தீர்ப்பு வந்துள்ளது. ஆம், உலகப் படுகொலைகள் வரலாற்றில் முதல்முறை​யாக, ஒரு நாட்டின் முன்னாள் அதிபர் போர்க்குற்றவாளியாக அறிவிக்கப்பட்டு, தண்டனையும் பெற்றுள்ளார். அவரது பெயர் சார்லஸ் டெய்லர்! 
வைரக்கல்லின் தேசம் என்றுதான் ஆப்​பிரிக்க நாடான சியாரா லியோனைச் சொல்​வார்கள். ஆனால், இந்த நாடு 1991 முதல் 2002-ம் ஆண்டு வரை உள்நாட்டுப் போர் நடைபெற்ற காலகட்டங்களில், ரத்தம் தெறிக்கும் கதறல் பூமியாக இருந்தது. இந்த உள்நாட்டுப் போரில் ஒரு பாவமும் அறியாத பொதுமக்களைக் கொடூரமாகக் கொலை செய்த ஆயுதக்குழுவுக்கு ஆதர​வாக இருந்தவர் சார்லஸ் டெய்லர் எனப்படும் சார்லஸ் மெக்ஆர்தூர் கங்காய் டெய்லர். இவர், அண்டை நாடான லைபீரியாவைச் 

சேர்ந்​தவர். இவரது ஆதரவு பெற்ற ஆயுதக் குழு கொலை, கற்பழிப்பு எனப் பல கொடூரங்​களுக்கு மக்களை உள்ளாக்கியது. 50 ஆயிரம் உயிர்க் கொலைகள், பல்லாயிரக்​கணக்கான பெண்கள் வன்புணர்ச்சி, கர்ப்பிணிப் பெண்களின் வயிற்றைக் கிழித்து கருவைப் பிடுங்கி எறிந்த கொடூரம் போன்றவை லியோனில் அரங்கேறின. சின்னஞ்சிறு குழந்தைகளின் கைகளை மணிக்கட்டு வரையில் கதறக் கதற வெட்டிப் போட்டது, வெறி பிடித்த புரட்சிக் குழு. ''நாளைக்கே உங்களுக்கு ஓட்டு உரிமை வந்தாலும் எங்கள் எதிரிக்கு நீங்கள் ஓட்டுப் போடக் கூடாது. அதற்குத்தான் இந்தத் தண்டனை!'' என்று அந்தக் குழந்தைகளை நோக்கி கொக்கரிப்பு வேறு (இப்படி கைகள் வெட்டப்பட்டஒரு பெண்ணின்  நிஜக்கதை 'என் பெயர் மரியாட்டூ' என்ற தலைப்பில் விகடன் பிரசுரமாக வெளியாகி உள்ளது!)இந்த ஆயுதக்குழுவின் ஆதரவோடு, லைபீரிய எல்லைப் பகுதியில் போர் நடத்தி, ராணுவக் கட்டமைப்போடும் பலத்தோடும் லைபீரிய அதிபரானார் சார்லஸ். இதன் பின் சார்லஸ் டெய்லருக்கு எதிராக வேறு ஓர் ஆயுதக் குழு உருவெடுத்தது. அதனால், 2003-ம் ஆண்டு ஆகஸ்ட் 11-ல் டெய்லரின் அதிபர் பதவி பறிபோனது. இதன்பின், நைஜீரியாவில் நாடு கடந்து வாழ்ந்து வந்தார் சார்லஸ் டெய்லர். அங்கிருந்து தப்பிச் செல்ல முயன்றபோது, நைஜீரிய எல்லையில் கோடிக்கணக்கான பணத்துடன் 2006-ம் ஆண்டு கைது செய்யப்பட்டார். இவர் மீது போர்க் குற்றம் சுமத்தப்பட்டது. ஐ.நா. மன்ற உதவியுடன் சியாரா லியோனில் உள்ள சிறப்பு விசாரணை நீதிமன்றத்துக்கு அழைத்துச் செல்லப்பட்டார்.

அங்கே, டெய்லரைக் கொல்வதற்கு பல முயற்சிகள் நடக்கவே, அவர் மீதான வழக்கு விசாரணை நெதர்லாந்தில் உள்ள தி ஹேக் நகருக்கு மாற்றப்பட்டது. அதுதான், சர்வதேச நீதிமன்​றங்களின் தலைமை இடம் என்பது குறிப்பிடத்தக்கது.
2007-ம் ஆண்டு ஜூன் மாதம் டெய்லர் மீதான விசாரணை தொடங்கப்பட்டு நான்கு ஆண்டுகளுக்கு மேலாக நடைபெற்றது. இந்த விசாரணையின்போது, தன் மீது சுமத்தப்பட்ட படுகொலைகள், அடிமைப்படுத்துதல், பாலியல் போன்ற எவ்விதப் புகார்களையும் அவர் ஏற்றுக்கொள்ளவில்லை. ஆனால், 'சார்லஸ் டெய்லர் போர்க் குற்றவாளிதான்’ என்பதற்கான குற்றங்கள் நிரூபிக்கப்பட்டன. அதை அடுத்து, 2012-ம் ஆண்டு ஏப்ரல் 26 அன்று 'சார்லஸ் டெய்லர் ஓர் போர்க் குற்றவாளியே’ என்று நீதிமன்றத்தால் அறிவிக்கப்பட்டது.
இந்த வழக்கின் இறுதித்தீர்ப்பு கடந்த 30-ம் தேதி வழங்கப்பட்டது. இந்த வழக்கில் சார்லஸ் டெய்லருக்கு 50 ஆண்டுகள் சிறைத்தண்டனை விதித்து தீர்ப்பு அளிக்கப்பட்டது. அப்போது கருத்து தெரிவித்த நீதிபதி ரிச்சர்ட் லூஸிக், 'சார்லஸ் டெய்லரின் போர்க் குற்றங்கள் மனித இன வரலாற்றில் மிக மிகக் கொடூரமானது. சியார லியோனில் நடைபெற்ற உள்நாட்டுப் போரின்போது பல கொடூரங்களைச் செய்த ஆயுதக் குழுவினருக்கு அனைத்து வகை​யிலும் உதவிகளைச் செய்துள்ளார். ஒரு நாட்டை ஆளக்கூடியவர், குற்றங்களைத் தடுக்கக்கூடியவராக இருக்க வேண்டும். பிறருக்கு எடுத்துக்காட்டாக இருக்க வேண்டும். மாறாக, குற்றங்களைச் செய்யக்கூடியவராக இருக்கக்கூடாது’ என்று குறிப்பிட்டு இருக்கிறார்.

நீதி தாமதிக்கலாம்... ஆனால், தோற்காது என்பதை அழுத்தமாக நிரூபித்துள்ளது, சார்லஸ் டெய்லருக்குக் கிடைத்திருக்கும் இந்தத் தண்டனை. இவருக்கே 50 ஆண்டுகள் தண்டனை என்றால், சியாரா லியோன் அரக்கத்தனத்தை தூக்கிச் சாப்பிட்ட ஈழத்துக் கொடுமைகளுக்கு... எரியும் குண்டுகளை வீசி கொத்துக் கொத்தாக தமிழர்களைக் கொன்று குவித்த பாவத்துக்கு என்ன தண்டனை ராஜபக்சேவுக்கு?!

மகா.தமிழ்ப் பிரபாகரன்

நன்றி: விகடன்

1 June 2012

கோவை நினைவுகள் -10

ஒரு சிலருக்கு பல சமயங்களில் தொடர்ந்த வாசிப்புகள் கொஞ்சம் சலிப்புத் தட்டி நமக்குள் இருக்கும் படைப்பு அரக்கனை தட்டி எழுப்பி விடும். வேறு சிலருக்கு தங்களின் தொடர்புகள் அல்லது தனது கவிதையோ கதையோ பிரபல இதழ்களில் வெளியாகமல் திருப்பி அனுப்பப் படும் போதும் அந்த அரக்கன் விழித்துக் கொள்வான். ஆனால் எனக்கு கவிதை (அ) கதை அல்ல ஒரு வாசகர் கடிதம் கூட அனுப்பிய அனுபவம் இல்லை. ஆனாலும் வாசிப்பு அடுத்த தளத்துக்குச் செல்ல தடுமாறிக் கொண்டிருந்த போது தான் அந்த விபரீத எண்ணம் எனக்குள் வந்தது. உடனே முத்துக்குமார் அண்ணாவிடம் சொன்னேன் ' நாம் ஏன் ஒரு பத்திரிக்கை ஆரம்பிக்கக் கூடாது' என்று. அவரும் எனக்கு இல்லை என்று சொல்லிப் பழகாததால் உடனே சரி என்றார். பின்னர் பத்திரிக்கை ஆரம்பிப்பதில் உள்ள சிக்கல்கள் மற்றும் சிரமங்கள் எல்லாம் பற்றி ஆலோசனை செய்த பின்னர் ஒரு வழியாக ஆரம்பிப்பது என்று முடிவு செய்து அதற்கான பூர்வாங்க வேலைகளில் இறங்க ஆரம்பித்தோம். என்னை ஒரு வாசன் போல, தினத்தந்தி நிறுவனர் ஆதித்தனார் போல, குமுதம் ஆசிரியர் போல‌ கற்பனை எல்லாம் செய்து பார்த்தேன். என்னையும் முத்துக்குமார் அண்ணாவையும் குமுதம் ஆசிரியர் மற்றும் எடிட்டர் போல எல்லாம் என் கற்பனை எங்கெங்கோ சென்றது.ஆனால் எதார்த்தம் என்பது கற்பனைக்கு எட்டாத உயரம் என்பதனை வேலைகளை ஆரம்பித்த சில தினங்களில் புரிந்து கொள்ளத் தொடங்கினோம். எங்களின் வேலை நேரம் போக மீதமிருந்த நேரம் முழுவதும் எங்களின் இதழ் பற்றிய சிந்தனையே எங்களை ஆட்கொண்டது. தலைப்பில் ஆரம்பித்தது எங்களின் தேடல். ஏதேதோ தலைப்புகள் என்று தேடி இறுதியில் தமிழோசை என்று முடிவு செய்தோம். இந்தத் தலைப்பினைப் பற்றி எங்களுக்குத் தெரிந்த பெரிய மனிதர்களிடம் கருத்துக் கேட்டோம். ஒவ்வொருவரும் தங்களின் எண்ணத்தினைக் கூறினார்கள். அவர்களின் கருத்துக்கள் எங்களுக்கு அவர்களைப் பற்றித் தெரிந்து கொள்ள மிகவும் உதவியது என்று தான் சொல்லவேண்டும். ஆனாலும் பெரும்பாலனவர்கள் தங்களுக்குப் பிடித்திருப்பதாகவே கூறினார்கள். எங்களுக்கு கொஞ்சம் ஆறுதலாக இருந்தது அவர்களின் கருத்துக்கள். இந்நிலையில் பாட்டாளி மக்கள் கட்சியின் நாளிதழுக்கு தமிழ் ஓசை என்று பெயர் சூட்டியதாக வெளியான செய்தி எங்களை கவலையின் உச்சத்திற்கு இட்டுச்சென்றது. இருந்தாலும் எங்களுடைய முடிவினில் மிகவும் தெளிவாக இருந்தோம். அடுத்த கவலை எங்களின் இதழ் எவ்வாறானது, வார இதழா, வாரம் இருமுறை, 15 நாளுக்கு ஒருமுறை, மாதஇதழ், எந்தக் கால இடைவெளியில் வெளியாக வேண்டும். ஒரே குழப்பமாக இருந்தது. சரி, எவ்வளவு பணம் செலவாகுமோ அதனைப் பொறுத்து முடிவு செய்யலாம் என்று அதற்கான விசாரனைகளில் இறங்கினோம். முதலில் வார இதழில் ஆரம்பித்த எங்களின் கனவு 1000 பிரதிகள் அச்சடிக்க ஆகும் செலவினைக் கேட்க கேட்க மெல்லச் சுருங்கி வாரஇதழ் காலாண்டு இதழில் வந்து நின்றது. பிறகு எங்கள் இதழ் அச்சாகும் அச்சகம் மற்றும் அதனை தட்டச்சு செய்ய என்று ஆட்கள் தேடியலைந்து ஒரு வழியாய் எங்களின் நண்பர்களே இவற்றினை செய்து தர எங்கள் இதழின் கருத்தின் வடிவமைப்பில் தொடங்கிய கலந்துரையாடல் பெரிய கலகத்தில் வந்து நின்றது.என்னென்ன தகவல்கள் இடம்பெற வேண்டும் எவ்வளவு இடம்பெற வேண்டும் என்பதில் தொடங்கி, இதழின் வடிவமைப்பு மற்றும் எழுத்துரு எப்படி இருக்க வேண்டும் என்பதில் எங்களுக்குள் பெரும் பூகம்பமே மூண்டது. பின்னர் ஒருவழியாக ஒவ்வொன்றாய் களைந்து இதழ் ஒரு வடிவிற்கு வந்து நின்றது. நான் யாரைப் பார்த்தாலும் என் இதழ் பற்றியும் அதற்கான சந்தா விபரங்கள் பற்றியும் மட்டுமே பேசும் ஒரு அறுவை கிராக்கி ஆகிப் போகியிருந்தேன். என்னைப் பார்த்தாலே என் உறவினர்களும் நண்பர்களும் தலைதெறிக்க ஓட ஆரம்பித்தனர். சிலர் என்னிடம் மாட்டிக்கொண்டு விழிபிதுங்கி 'தம்பி கொஞ்சம் நெஞ்சு வலிக்கிற மாதிரி இருக்கு, நாளைக்கு வாறியா' என்கிற மாதிரிப் பதில்களோடு என்னை எதிர் கொள்ள ஆரம்பித்தனர். ஒருவழியாக ஒரு மிகப் பெரியப் போராட்டத்திற்குப் பின்னர் யாராவது ஒருவரின் நேர்காணல் இருந்தால் நன்றாக இருக்கும் என்று அண்ணா ஒருவரிடம் என்னை அழைத்துச் சென்றார். அவர் தான் கோவை ஞானி அய்யா அவர்கள். மற்றவர்களின் அணுகு முறையிலிருந்து முற்றிலும் மாறுபட்ட அணுகுமுறையோடு சுற்றிலும் புத்தகங்கள் நம்பமாட்டீர்கள் கழிவறை முழுதும் புத்தகங்களின் பொதிக்குள் அவர் இருந்தார். அவரைப் பார்க்கும் வரை அவருக்கு பார்வை இல்லை என்கிற விபரம் தெரியாது. இந்த மனிதருக்கு பார்வை இல்லை என்றால் யாரும் நம்ப முடியாது. நானும் அவரைப் பார்த்த போது அதிர்ச்சியில் உறைந்து போனேன். மெய்மறந்து அவரை மட்டுமே பார்த்துக் கொண்டிருந்தேன். நாங்கள் சென்ற விபரம் சொல்லவும் 'ஓ பத்திரிக்கை ஆரம்பிக்கப் போறீங்களா, நல்லா ஆரம்பிங்க..' நாங்கள் கேட்ட முதல் நல்ல வார்த்தை அது தான். பின்னர் வாழைப் பழத்தில் ஊசி ஏற்றுவது போல பத்திரிக்கையின் நல்லது கெட்டது எல்லாம் சொல்லி நேர்காணலுக்கும் சம்மதம் சொன்னார். எல்லாம் முடிந்து எங்களின் இதழ் முதலில் அச்சேறியது. முதலில் அச்சில் இருந்து வந்த இதழின் மணமும் பட்டுப் போன்ற பளபளப்பும் மென்மையான அதன் ஸ்பரிசமும் இன்னமும் என் நினைவு அறைகளில் பசுமையாய் இருக்கிறது. ஞானி அய்யா தான் யாரெல்லாம் இதழ் விற்பவர்கள், அவர்களின் முகவரி, அனைத்தும் தந்து, அனைவரிடமும் அறிமுகம் செய்து என்று கிட்டத்தட்ட எங்களின் விளம்பர தூதர் போலவே இருந்து நெறிப்படுத்தினார். என் கவிதைகள் வேறு வெளியாகி இருந்தன. ஞானி அய்யா என் கவிதை பற்றி என்ன விமர்சனம் செய்வார். என்கிற எதிர் பார்ப்புடன் ஒவ்வொரு நாளும் காத்திருப்பேன். ஆனால் அவர் ஒரு வார்த்தை கூட அதனைப் பற்றி சொன்னதே இல்லை. நான் பொறுமை இழந்து ஒரு நாள் கேட்டே விட்டேன், ' என் கவிதை எல்லாம் எப்படி இருக்கு' என்று. அவர் சொன்ன பதில் ' ஒரு ஆயிரம் இது மாதிரி எழுதுனா, கண்டிப்பா கவிதை வந்துரும்' . அதற்குப் பின் கவிதை என்கிற ஒன்றை நான் நினைத்துக் கூடப் பார்த்தது இல்லை. எங்களின் இதழுக்கு பரவலான வரவேற்பு இருந்தது. எங்களுக்கு இதழ் வெளியிட தெரிந்த அளவுக்கு பணம் செய்யத்தெரியவில்லை. எங்கள் இதழ் மூன்றாவது இதழோடு தன் மூச்சை நிறுத்திக் கொண்டது. 

29 May 2012

கற்றது கைமண் அளவு- 28/05/2012


அதிக வேலைப்பளு மற்றும் தொடர் பயணங்கள் காரணமாக கடந்த பத்து நாட்களாக எழுத இயலவில்லை. இன்றும் கூட கண்டிப்பாக எழுதியே ஆகவேண்டும் என்கிற முடிவோடு தான் கணிணியின் முன் அமர்ந்தேன். ஆனாலும் தொடர் அழைப்புகளும் அழுத்திய வேலைப் பளுவும் என்னைச் சோர்வுறச் செய்தன என்பது மட்டும் என்னவோ உண்மை...தேர்வுகள் எப்போதும் மிகுந்த மன அழுத்தம் கொடுக்க கூடிய ஒன்று. சென்றவார +2 தேர்வு முடிவுகள் ஒரு கலைவையான உணர்வினைத் தான் எனக்குக் கொடுத்தது. எங்களின் அருகிருக்கும் கிராமத்தில் படித்த மாணவர்களில் சிலர் ஆயிரத்திற்கும் மேல் மதிப்பெண் வாங்கியிருந்தது மிகவும் மகிழ்ச்சியாக இருந்தது. அதே நேரம் நகரங்களில் பயின்ற உறவினர்களின் குழந்தைகள் ஏனோ மிகவும் குறைந்த மதிப்பெண் பெற்றிருந்தது எனக்குச் சிலவற்றை உணர்த்தியது...ஒன்று நகரத்தின் பள்ளி மாணவர்களின் கவனம் கலைக்க எத்தனையோ வழிகள் மேலும் அவர்களுக்கு ஒரு மிதப்பு இருக்கவே செய்கிறது. கிராமத்தில் இவற்றின் இடையூறுகள் இல்லை என்று சொல்லமாட்டேன் ஆனாலும் குறைவு மேலும் ஒரு முனைப்பு அவர்களிடம் இருக்கவே செய்கிறது. சரியான வழிகாட்டலுடன் வரும் கிராமத்து மாணவர்கள் பலர் உயரங்கள் தொடவே செய்கின்றனர். நகரத்துப் பெற்றோர்களும் எப்படி எல்லாம் நல்ல கல்லூரிகளில் பணம் கொடுத்து இடம் வாங்கி அடுத்து கட்டத்துக்கு தங்கள் பிள்ளைகளை அழைத்துச் சென்று விடும் வல்லமை நிறைந்தவர்களாகவே இருக்கிறார்கள். என் நண்பரின் மகள் 10 வகுப்பில் 475 மதிப்பெண்கள் பெற்று இம்முறை தேர்ச்சி பெற்றதே பெரிய காரியம் என்கிற அளவில் மதிப்பெண் வாங்கியது எனக்கு பேர‌திர்ச்சி தான். அவளின் மேல் வைக்கப்பட்ட மனச்சுமை அவளை சுத்தமாக முடக்கி விட்டது என்று தான் நான் சொல்வேன். எனக்கு அவளின் பாட அறிவின் மேல் அளவுகடந்த நம்பிக்கை உண்டு. நண்பர் பணத்தினைக் கொட்டி நல்ல கல்லூரியில் நல்ல ஒரு துறையை அவளுக்கு வாங்கிக் கொடுத்துவிட்டார். 

+++++++++++++++++++++++++++++++++++++++++++++++++++++++++++++++++++++++++++++++++++++++++++++++++++++++


சென்றவாரம் நடந்த சில நிகழ்வுகள் என்னை மிகவும் பாதித்தன. குறிப்பாக என் வேலை நிமித்தம் சில இடங்களுக்கு இரண்டடுக்குப் பேருந்தில் செல்ல நேர்ந்தது. மேல்லடுக்கில் அமர்ந்து செல்வது எனக்கு மிகவும் பிடிக்கும் என்பதால் மேலே சென்று அமர்ந்து கொண்டேன். எனக்கு நேர் எதிரில் அமர்ந்திருந்த இரண்டு பள்ளிச் சிறுமிகள் யாருடனோ கைபேசியில் கதைத்துக் கொண்டு வந்து கொண்டிருந்தனர். நான் அவர்கள் என்ன பேசுகிறார்க்ள் என்று கவனிக்கவில்லை. ஆனாலும் அவர்களின் பேச்சு நாகரீகமற்று ஒரே இறைச்சலாக இருந்தது. எனக்கு இங்கிருக்கும் பள்ளி மாணவர்களின் மேல் நல்ல அபிப்பிராயம் இல்லை என்றாலும் அவர்கள் அடுத்துச் செய்த காரியம் என்னை அதிர்ச்சியின் உச்சத்திற்குக் கொண்டு சென்றது. இருவரும் முத்தமிடுவதும், தங்களின் அங்கங்களை.....என்று அநாகரீகத்தின் உச்சகட்ட எல்லைவரை சென்றது. இதற்கு மேல் இங்கிருந்தால் சரிப்படாது என்று நான் இறங்கவேண்டிய நிறுத்தத்திற்கு முன் நிறுத்ததில் இறங்கி நடக்க ஆரம்பித்தேன். அன்று முழுவதும் இந்தச் சூழ்நிலையில் எப்படி என் குழந்தையை வளர்ப்பது என்கிற எண்ணம் என்னை படுத்தி எடுத்துவிட்டது.........

+++++++++++++++++++++++++++++++++++++++++++++++++++++++++++++++++++++++++++++++++++++++++++++++++++++++

சென்றவாரம் பிரிட்டன் கொழுந்துவிட்டு எரிந்தது என்றால் மிகை இல்லை. எங்கும் அதிகபட்ச வெப்பம் 24-26 பாகை செல்சியஸ் ஆக இருந்தது..இருக்கிறது. எடின்பரா கொஞ்சம் பரவாயில்லை...பகலில் வெப்பம் அதிகமாக இருந்தாலும் (18 பாகை செல்சியஸ்) இரவு நேரங்களில் 10-12 ம் ஆக இருந்தது. சூரியனின் கதிர் வீச்சு இங்கு மிகவும் அதிகம் மற்றும் புற ஊதாக் கதிர்களின் (UV rays) அடர்த்தியும் அதிகம் என்பதால் நாம் உணரும் வெப்பத்தின் அளவு சராசரியை விடவும் அதிகமாக இருக்கும். வெள்ளக்கார மக்கள் துணி துறந்து அரை நிர்வாண பக்கிரிகளாய் உலாவருகின்றனர். ஊருக்கு பேசியபோது அவர்களும் இங்கும் தாங்க முடியாத வெக்கையா இருக்குப்பா என்று சொன்னார்கள்...அதிக வெப்பத்தால் வெளியில் சென்று விளையாட முடியாமல், துண்டை நனைத்து அதை விரித்து அதன் மேல் படுத்திருந்த சிறுவயது நினைவுகள் ஏனோ வந்து போனது....

+++++++++++++++++++++++++++++++++++++++++++++++++++++++++++++++++++++++++++++++++++++++++++++++++++++++
சிரியாவில் வன்முறை வரைமுறையற்று சென்று கொண்டிருக்கிறது...சிறுவர்கள் முதற்கொண்டு நூற்றுக்கும் அதிகமானோர் கொல்லப்பட்ட சம்பவம் ஏனோ மனதினை அறுத்தது...வன்முறையின் மேல் மனிதர்களுக்கு இருக்கும் பற்று எப்போது அற்றுப் போகும்...

+++++++++++++++++++++++++++++++++++++++++++++++++++++++++++++++++++++++++++++++++++++++++++++++++++++++
ஒரு பாக்கிஸ்தானிய தம்பதியினர் தங்கள் மகளைக் கொன்ற சம்பவம் சென்றவாரச் செய்திகளில் முக்கியத்துவம் வாய்ந்ததாக அமைந்தது....இதனைப் பார்த்த இளைய மகள் போலீஸிடம் சொல்லியிருக்கிறார் அதுவும் கிட்டத்தட்ட பத்து வருடங்கள் கழித்து...இந்தப் பெண் ஒரு கடையில் திருடும் போது மாட்டிக் கொண்டு ஏதேதோ சொல்லி தப்புவதற்கு முயலும் போது தனது அக்காவை தனது பெற்றோர் தன் கண் முன்னால் கொன்றனர் என்று சொல்லி ஆரம்பித்து வைக்க போலீஸ் இதன் ஆதி அந்தபற்றி விசாரணை செய்யத் தொடங்கியிருக்கிறது...... அவர்களுக்கு கிடைத்த பதில்...இங்கேயே பிறந்து வளர்ந்த அந்தப் பெண் மேனாட்டு கலாச்சாரப் படி 15 வயதில் தனக்கான ஆண் நண்பரை வைத்துக் கொள்வது, இன்ன பிற சமாச்சாரங்களுடன் வளைய வந்தவரை பெற்றோர் கண்டித்து பாக்கிஸ்தான் அழைத்துச் சென்று திருமணம் செய்ய முயன்றிருக்கிறார்கள். பின்னர் ஏதோ பிரச்சனையில் மீண்டும் இங்கிலாந்து வந்து அந்தப் பெண்ணை கொன்று விட்டார்கள் என்று தங்கை வாக்குமூலம் கொடுத்துள்ளார்.

+++++++++++++++++++++++++++++++++++++++++++++++++++++++++++++++++++++++++++++++++++++++++++++++++++++++

அப்பாட ஒரு வழியா ஐ.பி.எல் முடிந்துவிட்டது. இன்னும் கொஞ்ச காலத்துக்கு இதைப் பற்றியே பேசிக் கொள்(ல்)வார்கள். நான் இறுதிப் போட்டி கூட காண முடியவில்லை...பெரிய விருப்பமும் இல்லை.

+++++++++++++++++++++++++++++++++++++++++++++++++++++++++++++++++++++++++++++++++++++++++++++++++++++++
இந்த வார இசைப் பேரரசனின் மயக்கும் மெலடி....எப்போது கேட்டாலும் இதனுள் இருக்கும் இளமைத் துள்ளல் என்னைக் கட்டிப் போடும்.....



+++++++++++++++++++++++++++++++++++++++++++++++++++++++++++++++++++++++++++++++++++++++++++++++++++++++
இந்தவார ஆவணப்படம்.....



+++++++++++++++++++++++++++++++++++++++++++++++++++++++++++++++++++++++++++++++++++++++++++++++++++++++


20 May 2012

கற்றது கைமண் அளவு- 20/05/2012



எப்படியோ அதிர்ஷ்ட தேவதை மீண்டும் தோனியை கடைசி நாலு இடங்களில் விட்டுச் சென்றுள்ளாள். எனக்கு என்னவோ சென்னை தான் இந்த முறையும் வெல்லுவார்கள் என்றே தோன்றுகிறது. என்ன தான் மாற்றுக் கருத்து இந்த கிரிக்கெட் தொகுப்பு ஆட்டங்கள் பற்றி இருந்தாலும் பார்க்க சுவையானதாகவே இருக்கிறது. மக்கள் வேலை வெட்டி எல்லாம் விட்டு விட்டு இதே வேலையாக இருப்பது தான் கவலை அளிக்கிறது....



ஐ.பி.எல்.துளிகள்:

ஐ.பி.எல் தொடரில் பல்வேறு சுவையான சம்பவங்கள் நடக்கின்றன. அணிகளுக்குள்ளும் வெளியேயும் என்று இந்த கிரிக்கெட் திருவிழாவில் நடந்த கொஞ்சம் கலவையான சில நிகழ்வுகள்....

அமெரிக்க பெண்ணிடம் தவறாக நடக்கு முயன்ற புகாரின் பேரில் பெங்களூரு  ராயல் சேலஞ்சர்ஸ் அணி வீரர் லூக் போமர்பச் கைது செய்யப்பட்டு, பின்னர் விடுவிக்கப்பட்டார். 

ராயல்சேலஞ்சர்ஸ் பெங்களூர் அணியின் வீரர் லூக் மீது பாலியல் புகார் கொடுத்த அமெரிக்கப் பெண் இப்போது அந்த அணியின் உரிமையாளர் விஜய் மல்லையாவின் மகன் சித்தார்த் மல்லையாவுக்கு நோட்டீஸ் அனுப்பியுள்ளார்.

ஐபிஎல் கிரிக்கெட் போட்டியில்,மேட்ச் பிக்சிங் எனப்ப்டும் போட்டி  நிர்ணயத்துக்காக இலங்கை வீரருக்கு 10 கோடி ரூபாய் வழங்கப்பட்டது என்று ஆட்ட நிர்ணயக்காரர் ஒருவர் சாட்சியமளித்துள்ளதாக தகவல்கள் வெளியாகி உள்ளது. 

அவதூறாக பேசி ரகளையில் ஈடுபட்டதால்,மும்பை வான்கடே மைதானத்துக்குள் நுழைய பிரபல பாலிவுட் நடிகர் ஷாருக்கானுக்கு வாழ்நாள் தடை விதிப்பதாக மும்பை கிரிக்கெட் சங்கம் ஆறிவித்துள்ளது.

ஐபிஎல் கிரிக்கெட் சூதாட்டத்தில் தொடர்பு இருப்பதாக தொலைக்காட்சி ஒன்று  நடத்திய ரகசிய பேரம் மூலம் தெரியவந்த 5 வீரர்களை சஸ்பெண்ட் செய்து பிசிசிஐ உத்தரவிட்டுள்ளது. 

ஐ.பி.எல். கிரிக்கெட் போட்டிகளை நிறுத்த வேண்டும் என்று ராஷ்ட்ரீய ஜனதா தளத் தலைவர் லாலு பிரசாத் யாதவ் வலியுறுத்தியுள்ளார். 

முன்னாள் கிரிக்கெட் வீரர் ஒருவர் தற்போது பாராளுமன்ற உறுப்பினர். அவரும் ஐபிஎல் போட்டிகளைத் தடை செய்ய வேண்டும் என்று டிவியில் முழங்கிக் கொண்டிருந்தார். 

++++++++++++++++++++++++++++++++++++++++++++++++++++++++++++++++++++++++++++++++++++++++++++++++++++++++

குழந்தைகளுக்கு எதிரான வன்முறை என்பது எல்லா இடங்களிலும் இருக்கத் தான் செய்கிறது. பிரிட்டனில் தன் மகனை அடித்தே கொன்றிருக்கிறார் ஒரு பெண். எனக்கு அந்தப் படங்களைப் பார்த்த போதும் அதன் செய்தியைப் பார்த்த போதும் நெஞ்சு பதறிப்போனது. சிறிது நேரத்திற்கு முன்பு கூட ஒரு குழந்தையை ஒரு பெண் துவைத்து எடுப்பது போன்ற ஒரு காணொளி ஒன்றினை முகநூலில் பார்த்தேன். என் இதயத்துடிப்பு ஒரு நிமிடம் நின்று போனது. நண்பர்களே குழந்தைகளுக்கு எதிரான வன்முறை எந்த வடிவில் வந்தாலும் அதற்குக் கடுமையான எதிர்ப்பினை பதிவு செய்யுங்கள்...

++++++++++++++++++++++++++++++++++++++++++++++++++++++++++++++++++++++++++++++++++++++++++++++++++++++++

2012 ஜூலை 27ம் தேதியன்று லண்டனில் துவங்க உள்ள 27வது ஒலிம்பிக் தொடருக்கான ஒலிம்பிக் ஜோதி,கிரீஸின் ஒலிம்பியா நகரில் ஏற்றப்பட்டு இங்கிலாந்துக்கு இது கொண்டுவரப்படும். ஒலிம்பியாவில் இருந்து எடுத்துச் செல்லப்படும் ஒலிம்பிக் ஜோதி,பல நாடுகள் வழியாக 78 நாட்களில் ஒலிம்பிக்கில் பங்கேற்கும் அனைத்து நாடுகளுக்கும் எடுத்துச் செல்லப்படும்.  இதன் பிறகு இந்த ஜோதி இங்கிலாந்தில் மட்டும் 8 நாட்கள் பயணம் மேற்கொண்டு இறுதியாக லண்டன் வந்தடையும். நாங்கள் இருக்கும் தெருவின் வழியாகவும் இந்த முறை செல்லும் என்பது கூடுதல் மகிழ்ச்சி. 

 ++++++++++++++++++++++++++++++++++++++++++++++++++++++++++++++++++++++++++++++++++++++++++++++++++++++++


இளையராஜாவின் இசைக்கு பாடல் வரிகள் தேவையே இல்லை என்று நிரூபிக்கும் இன்னொரு பாடல். தமிழ் சினிமாவில் அதிக அளவு ஹிட் படங்கள் கொடுத்த இராமராஜனுக்கு இவரின் இசை எப்போதும் மிகவும் சிறப்பாக இருக்கும்.....



 ++++++++++++++++++++++++++++++++++++++++++++++++++++++++++++++++++++++++++++++++++++++++++++++++++++++++
நான் பார்த்து வியந்த ஆவணப்படங்களில் ஒன்று....





 ++++++++++++++++++++++++++++++++++++++++++++++++++++++++++++++++++++++++++++++++++++++++++++++++++++++++

17 May 2012

மதன் கேள்வி! விகடன் பதில்!


மதன் கேள்வி! விகடன் பதில்!

விகடனில் மதன் இனி இல்லை என்பது கொஞ்சம் கேட்கச் சிரமமாகத்தான் இருக்கிறது....ஆனால் விகடனின் முடிவு எனக்கு ஆச்சர்யமளிக்கிறது.


க.தியாகராசன், கொரநாட்டுக்கருப்பூர்.

உலகில் உள்ள உயிரினங்களில் ஒன்று மற்றொன்றின் காலில் விழுந்ததாக வரலாறு இல்லை. ஆனால், மனிதன் மட்டும்இதற்கு விதிவிலக்காக இருப்பது ஏன்? இதைத் தொடங்கிவைத்தது யார்?

ஆதி மனிதன்தான். திடீர் என்று தெருவில் குண்டு வெடிக்கிறது. உடனே என்ன செய்கிறீர்கள்? தரையோடு படுத்துக்கொள்கிறீர்கள். காரணம், அதில்தான் ஆபத்து ரொம்பக் குறைவு. ஆதி மனிதனும் திடீர் என இடி இடித்தாலோ, பெரிய மின்னல் தோன்றினாலோ தனக்கு ஆபத்து ஏற்படாமல் இருக்கத் தரையில் நடுங்கிப் படுத்துக்கொண்டான். பிறகு, சூரியன் போன்ற இயற்கை விஷயங்களின் முன்பு 'எனக்கு எந்த ஆபத்தும் ஏற்படுத்தாதே’ என்பதை விளக்க, குப்புறப் படுத்தான். பிறகு, அரசர்கள் முன்பு, இன்று தலைவர்கள் காலடியில் ('பதவி ஏதாவது தந்து என்னைக் காப்பாற்றுங்கள்’ என்று அர்த்தம்!). விலங்குகளும் தத்தம் தலைவன் முன்பு அடிபணிகின்றன. 'நான் உனக்கு அடங்கிப்போகிறேன்!’ என்கிற ஓர் அர்த்தம்தான் அதற்கு உண்டு!
மேற்கண்ட கேள்வி - பதில் வெளியானதைத் தொடர்ந்து, அதில் இடம் பெற்ற படத்துக்கு எதிர்ப்பு தெரிவித்து விகடன் நிர்வாக இயக்குனருக்கு மதன் அனுப்பியுள்ள கடிதம்...
...பல ஆண்டுகளாக விகடனில் நான் எழுதி வரும் 'ஹாய் மதன்’ பகுதியில் வரும் என் பதில்கள் பொது அறிவு பற்றியது என்பது தங்களுக்குத் தெரியும். ஆயிரக்கணக்கான விகடன் வாசகர்கள் - வரலாறு, விஞ்ஞானம், மருத்துவம், மனித இயல், விலங்கியல் சம்பந்தப்பட்ட கேள்விகளைத்தான் எனக்கு எழுதி அனுப்புகிறார்கள். அரசியலையும் சினிமாவையும் நான் அநேகமாகத் தொடுவதில்லை.

2.5.2012 இதழில் 'காலில் விழுந்து வணங்குவது’ பற்றிய மனித இயல் (Anthropology) பற்றிய ஒரு கேள்விக்கு, ஆதி மனிதன் எப்படி அதை ஆரம்பித்திருக்கக்கூடும் என்று விளக்கி, பொதுவான ஒரு பதில் எழுதியிருந்தேன். ஆனால், அந்தப் பதிலுக்கான படம் என்று, தமிழக முதல்வர் ஜெயலலிதாவின் காலில் ஒருவர் விழுவது போன்ற பெரிய புகைப்படம் வெளியிடப்பட்டு இருக்கிறது. இது எனக்கு மிகவும் அதிர்ச்சியையும் வருத்தத்தையும் அளித்தது. ஆதிகாலத்திய சம்பிரதாயம் பற்றிய பொது அறிவுப் பதில் தான் அதுவேயன்றி, குறிப்பிட்ட ஒருவரைப் பற்றிய பதிலே அல்ல அது!

ஜெயா டி.வி-யில் நான் சினிமா விமர்சனம் செய்துவருகிறேன். இந்நிலையில், அவர்கள் அந்தப் புகைப்படத்தை ஹாய் மதன் பகுதியில் வெளியிட்டதற்கு நான்தான் காரணமோ என்று தவறாக நினைத்துக்கொள்ள மாட்டார்களா? என்னிடம் ஜெயா டி.வி-யின் தலைமை அதுபற்றி விளக்கம் கேட்டால், 'அந்த புகைப்படம் வெளிவந்ததற்கு நான் காரணமல்ல’ என்று இதன் பின்னணியை விவரமாக விளக்க வேண்டி வராதா? அந்த தர்மசங்கடம் எனக்குத் தேவைதானா? முப்பதாண்டு காலம் விகடன் நிறுவனத்துக்காக உழைத்த எனக்கு இப்படியரு பிரச்னையை ஏற்படுத்துவது நேர்மையான, நியாயமான செயல்தானா என்பதை தாங்கள் சிந்திக்க வேண்டும்.

முக்கியமான பிரச்னைகள் எத்தனையோ சந்தித்துக்கொண்டிருக்கும் தமிழக முதல்வரிடம் இதற்காக அப்பாயின்ட்மென்ட் கேட்டு, அவரைச் சந்தித்து, நான் செய்யாத தவறுக்கு விளக்கம் தந்துகொண்டிருக்க வேண்டிய சூழ்நிலையை எனக்கு ஏற்படுத்துவது முறையா என்று சிந்திக்க வேண்டுகிறேன்.

...வரும் இதழிலேயே 'புகைப்படங்கள், லே - அவுட்டுக்கு மதன் பொறுப்பல்ல’ என்ற விளக்கத்தையாவது வெளியிட்டால், நியாயம் காப்பாற்றப்படும். அதை வரவிருக்கும் இதழிலேயே செய்வீர்கள் என்று நான் உறுதியாக நம்புகிறேன்.

- மதன்
தன் நமக்கு எழுதியிருக்கும் இந்தக் கடிதம், தவிர்க்க முடியாத சில நெருக்கடி களுக்கும் நிர்பந்தங்களுக்கும் அவர் சமீப காலமாக ஆளாகி இருக்கிறார் என்பதையே காட்டுகிறது.

'ஹாய் மதன்' பகுதியில் வாசகர்கள் கேட்ட கேள்வியிலோ, மதன் அளித்த பதிலிலோ நேரடி வார்த்தைகளில் இடம் பெறாத - அதே சமயம், அந்தக் கேள்வி - பதிலுக்கு மேலும் வலிமையும் சுவாரஸ்யமும் சேர்க்கக்கூடிய படங்களை இதற்கு முன் ஏராளமான சந்தர்ப்பங்களில் ஆசிரியர் குழு சேர்த்துள்ளது. அப்போதெல்லாம், எந்தக் காரணங்களைக் காட்டியும் ஒருபோதும் எந்த ஆட்சேபமும் அவர் தெரிவித்ததே இல்லை.

அதேபோல், 'இது பொது அறிவுப் பகுதி மட்டுமே' என்று இப்போது மதன் குறிப்பிடும் 'ஹாய் மதன்' பகுதியில் அரசியல் மற்றும் சினிமா பற்றிய நேரடியான, காரசாரமான பதில்களை அவர் தொடர்ந்து இதழ் தவறாமல் அளித்திருப்பதை வாசகர்களும் நன்கு அறிவார்கள். இப்போது திடீரெனத் தன் நிலைப்பாட்டை அவர் மாற்றிக்கொள்வதற்கான காரணம், அவருடைய கடிதத்திலேயே உள்ளது.

இதையெல்லாம் பார்க்கும்போது... தற்போது அவர் இருக்கின்ற சூழ்நிலையில், 'ஹாய் மதன்' பகுதியை மட்டும் அல்ல... கார்ட்டூன்களையும்கூட நடுநிலையோடு படைப்பது அவருக்குச் சாத்தியம் ஆகாது என்ற முடிவுக்கே வரவேண்டியிருக்கிறது. குறிப்பிட்ட ஒரு தரப்பைப் பற்றிய நியாயமான விமரிசனங்களையோ, புகைப்படங் களையோ தவிர்த்துவிட்டு... செய்திகளையும் கருத்துக்களையும் நீர்க்கச் செய்வது வாசகர்களுக்குச் செய்யும் மிகப் பெரிய துரோகம் என்றே விகடன் கருதுகிறான்.

எனவே, இந்த இதழ் முதல் திரு. மதனின் கேள்வி - பதில் பகுதியும் அவருடைய கார்ட்டூன்களும் விகடனில் இடம் பெறாது என்பதைத் தெரிவித்துக்கொள்கிறோம்.

- ஆசிரியர்

நன்றி : ஆனந்தவிகடன்

13 May 2012

கற்றது கைமண் அளவு- 13/05/2012


  

இன்று அன்னையர் தினம். தாய் அன்புக்கு ஈடாக இவ்வுலகில் எதுவும் இல்லை. நாம் வழிபடும் அனைத்து அம்மன்களும் நம் தாய் வழிபாட்டின் நீட்சியே. தாய் இல்லாத உலகின் வெறுமை கற்பனைக்கும் எட்டாத ஒன்று. நம் இனக்குழுக்கள் எல்லாம் தாய்வழிச் சமூகமே. தாய்வழிபாடு (அ) அம்மன் வழிபாடு செய்யும் எந்தச் சமூகமும் அல்லது இனமும் தொன்மைச் சமூகமே. அண்மைக்காலமாக அதிகரித்துள்ள அன்னையர் தின கொண்டாட்டம் என்பது முதன் முதலாக அமெரிக்காவின் வர்ஜீனியா மாகாணத்தில் 1908-ல் கொண்டாடப்பட்டது. இன்று உலகம் முழுவதும் 70 நாடுகள் அன்னையர் தினத்தைக் கொண்டாடி வருகின்றன. இது வெறும் ஒரு நாள் கொண்டாட்டம் என்கிற அளவில் நிறுத்தி விடாமல் தினமும் அவர்களைத் தொழுவது நம் கடமைகளில் ஒன்றாய் கொள்ளலாம்.
==================================================================================================

நீதிமன்ற அதிரடிகள்:

ஹஜ் பயணிகளுக்கு வழங்கப்படும் அரசு மானியத்தை,10 ஆண்டுகளுக்குள்  முற்றிலும் ரத்து செய்திட வேண்டும் என மத்திய அரசுக்கு உச்ச நீதிமன்றம்  உத்தரவிட்டுள்ளது. அப்படியே தமிழ்நாட்டுல இருக்குற இலவசத்தையும் நிறுத்தி உத்தரவிடுங்க, எசமான் உங்களுக்கு புண்ணியமாப் போகும்...!

திருமணமான பெண்கள் சீதையை முன்னுதாரணமாக கொள்ள வேண்டும். சீதையைப் போல வாழ வேண்டும் என்று மும்பை உயர்நீதிமன்றம் கருத்து தெரிவித்துள்ளது. தன்னுடன் வேலை இடத்திற்கு வந்து வசிக்க முடியாது என்று கூறிய மனைவியை விவாகரத்து செய்யக் கோரி ஒருவர் தாக்கல் செய்த வழக்கில் தான் இந்த அறிவுரை. என்னமோ போங்க ....!

பாலியல் மாற்று அறுவை சிகிச்சை செய்துகொள்ள 21 வயது மாணவனுக்கு மும்பை உயர் நீதிமன்றம் அனுமதி அளித்துள்ளது. அசாம் மாநிலம் குவாஹாட்டியைச் சேர்ந்தவர் பிதான் பருவா (21). மாணவர் தன்னை பெண்ணாக நினைத்து தான் பால் மாற்று அறுவைச் சிக்கிச்சை செய்ய அனுமதிக்க வேண்டும் என்று நீதிமன்றத்தை அனுகியுள்ளார். மனுவை விசாரித்த நீதிபதிகள் 'பிதான் ஒரு மேஜர். அவர் எந்த முடிவையும் தன்னிச்சையாக எடுக்கலாம். அவர் பாலியல் மாற்று அறுவை சிகிச்சை செய்துகொள்ள யாரும் தடைவிதிக்க முடியாது. அவருக்கு எந்தவித ஆபத்தும் ஏற்படாமல் பாதுகாக்க வேண்டியது போலீசாரின் கடமை. பிதான் தனக்குள்ள அச்சுறுத்தல்கள் குறித்து கொலாபா காவல் நிலையத்தில் புகார் கொடுக்கலாம். அது குறித்து விசாரித்து அச்சுறுத்தல்கள் ஏதும் இருந்தால் போலீசார் உரிய நடவடிக்கை எடுக்க வேண்டும்' என்றும் கூறியுள்ளனர். நல்லது தான்...

அணுகுண்டை விட மோசமானது பிளாஸ்டிக் பைகள் என்று கருத்து  தெரிவித்துள்ள உச்ச நீதிமன்றம்,இதனை ஒழிக்க மத்திய ,மாநில அரசின்  நடவடிக்கைகள் எந்த அளவிற்கு உள்ளது என்பது குறித்து விளக்கம் அளிக்குமாறு நோட்டீஸ் அனுப்பியது.சிலவற்றுக்கு உத்தரவு மட்டும் போதாது, மக்களின் மனதில் மாற்றம் வரவேண்டும். பிளாஸ்டிக் பொருட்கள் பயன்பாட்டை நாம் குறைத்தாலே போதும் தானே....

முல்லைப் பெரியாறு அணை பலமாக உள்ளது என்று உச்ச நீதிமன்றத்திடம்  ஏ.எஸ். ஆனந்த் தலைமையிலான ஐவர் குழு அளித்த ஆய்வறிக்கையில்  தெரிவிக்கப்பட்டுள்ளது. இதுக்கு என்ன கருத்துச் சொல்லுறது...!

==================================================================================================
ஒரு நெகிழ்ச்சி:

வழக்கு எண் 18/9 திரைப் படத்தின் இயக்குநர் பாலஜி சக்திவேல் தனது தயாரிப்பாளர் மற்றும் மீடியாவினர் காலில் விழுந்து நன்றி சொன்னார். பார்த்தபோது கொஞ்சம் நெகிழ்வாக இருந்தாலும் என்ன கிறுக்குத் தனம் இது என்று தோன்றியது. 

==================================================================================================

காமெடி:

நித்யானந்தாவால் உலகில் உள்ள இந்துக்கள் தலைநிமிர்ந்து நடக்கின்றனர் என்று அகில பாரத இந்து மகா சபா கூறியுள்ளது. அகில பாரத இந்து மகா சபா தலைவர் சக்ரபாணி மகாராஜ் தலைமையிலான அதன் நிர்வாகக் குழுவினர்  மதுரை மடத்திற்கு வந்து கூறிய கருத்து தான் இது...மேலும் இவர் 'நித்யானந்தரின் நடவடிக்கைகளை அவர் இந்து மதத்திற்கு ஆற்றி வரும் தொண்டுகளை பொறுக்க முடியாத சிலர் அவருக்கு எதிர்ப்புத் தெரிவித்து வருகின்றனர்.அவர்கள் இந்து மத விரோதிகள்' என்றும் கூறியுள்ளார்.இது மட்டுமின்றி ஏகப்பட்ட சவால்கள், கலாட்டாக்கள், என்று நித்தியானந்தாவால் களைகட்டியிருக்கிறது. நடிகை ரஞ்சிதா தன்னுடன் இல்லை என்று இவரும், காஞ்சி சங்கராச்சாரியார் பற்றி எனக்குத் தெரியாதா, அவருக்கு என்னைப் பற்றி பேச எந்த அருகதையும் இல்லை என்று ரஞ்சிதாவும் மாறி மாறி வசை மாரி பொழிந்து கொண்டிருக்கின்றனர்.இப்பத்தான் காட்சி சூடு பிடிக்குது...

==================================================================================================


துளிகள்:

பிரான்ஸ் அதிபர் தேர்தலில் நிக்கோலஸ் சர்கோஸி தோல்வியடைந்துள்ள  நிலையில்,புதிய அதிபராக பிரான்காய்ஸ் ஹோலண்ட் தேர்வு செய்யப்பட்டுள்ளார்.

உலக ஊடக விருது விழா ஒன்றில்,சிறந்த தொலைக்காட்சி நிறுவனம் மற்றும் சிறந்த ஆவணப்படம் ஆகிய விருதுகள் சேனல் 4 தொலைக்காட்சிக்கு வழங்கப்பட்டுள்ளன.

இலங்கை பள்ளிகளில் சீன மொழியும் கற்றுத்தரப்படும். 'இலங்கை - சீன நட்புறவை மேலும் வலுப்படுத்திக்கொள்ளவே இந்த நடவடிக்கை. சீன மொழி கற்பிக்கத் தேவையான மனிதவளம் மற்றும் அதற்கான செலவுகளை சீனாவே வழங்க முன்வந்து உள்ளது’ - இது இலங்கை கல்வித் துறை அமைச்சர் பந்துல குணவர்த்தனவின் பெருமித அறிவிப்பு. 

அணு சக்திப் பயன்பாட்டுக்கு முன்னுதாரணமாக ஜப்பான் சொல்லப்பட்டது ஒரு காலம். இப்போது ஜப்பான் அணு சக்தியே இல்லா தேசம்! டோமாரி அணு மின் நிலையத்தில் இயங்கிவந்த மூன்றாவது அணு உலையைக் கடந்த வாரம் மூடியதன் மூலம் தற்காலிகமாக அணு சக்தி இல்லா நாடாக மாறி இருக்கிறது ஜப்பான். ஃபுகுஷிமா அணு உலை விபத்துக்குப் பிறகு, அணு உலைகளில் சுனாமியை எதிர்கொள்ளும் திறனை மேம்படுத்தும் நோக்கிலேயே ஜப்பான் அரசு அணு உலைகளை மூடிவருகிறது. ஆனால், மூடப்பட்டுள்ள அணு மின் நிலையங்களை மீண்டும் தொடங்க, ஜப்பானிய நடைமுறைப்படி, அந்தந்த உள்ளாட்சி நிர்வா கங்களின் அனுமதி அவசியம். மக்கள் அணு சக்தி இல்லாத ஜப்பானை வரவேற்கும் வகையில் ஊருக்கு ஊர் பேரணிகளை நடத்திவரும் சூழலில், நிரந்தரமாகவே ஜப்பான் அணு சக்திக்கு விடை கொடுத்துவிட்டதாக எடுத்துக்கொள்ளலாம் என்கிறார்கள் சுற்றுச்சூழல் ஆர்வலர்கள்.

ஒலிம்பிக் வரலாற்றில் முதல்முறையாக பேட்மின்டன் இரட்டையர் பிரிவில் விளையாடத் தகுதிபெற்று இருக்கிறது இந்தியா. ஜுவாலா கட்டா, அஷ்வினி பொன்னாப்பா இணையே அந்தச் சாதனை ஜோடி. 2010 டெல்லி காமென்வெல்த் போட்டியிலும் இதே ஜோடிதான் தங்கம் தட்டியது.

உத்தரப்பிரதேச மாநில ஃபதேபூரைச் சேர்ந்த போலீஸ் கான்ஸ்டபிள் ஹரிச்சந்திராவின் கோரிக்கை மனு, ஜனாதிபதி அலுவலகத்தையே அதிரவைத்தது. 'நான் தற்கொலை செய்துகொள்ள இந்திய அரசு சட்டப்பூர்வமாக அனுமதிக்க வேண்டும்’ என்பதே அந்தக் கோரிக்கை. ''சீனியர் அதிகாரிகளின் அதீத டார்ச்சர் காரணமாக 35 வயதிலேயே முடி கொட்டி, பார்வை மங்கி பலவீனமாகிவிட்டேன். எனக்கு வாழவே பிடிக்கவில்லை. அதனால்தான் இந்த முடிவு'' என்கிறார் ஹரிச்சந்திரா. அதற்கு ஃபதேபூர் மாவட்ட எஸ்.பி-யான சதுர்வேதி, ''ஒருவர் தன் வாழ்க்கையை முடித்துக்கொள்ள அனுமதிப்பதற்கு எல்லாம் சட்டத்தில் இடம் இல்லை. தாமாகவே ரயில் தண்டவாளத்தில் தலை வைத்துப் படுத்துக்கொண்டு சாகலாம். அதற்குக் கட்டணம் எதுவும் கிடையாது'' என்று 'ஐடியா’ சொல்லி, கண்டனங்களைச் சம்பாதித்துக்கொண்டு இருக்கிறார். 

(நன்றி விகடன்)


==================================================================================================
இந்த வார ஆவணப்படம். 






=================================================================================================
இந்தப் பாடல் என்னையும் அறியாமல் வாரத்தில் ஒரு 15-20 முறை பாடி விடுவேன்.... இளையராஜாவின் தாலாட்டும் மெல்லிசை.


==================================================================================================

7 May 2012

லஃபரோ முதல் எடின்பரா வரை -6

 


தொடர்வண்டி டார்லிங்டன் மற்றும் டர்காம் தாண்டி நியுகாஸலில் வந்து நின்றது. இங்கிருந்து இன்னும் இரண்டு மணி நேரத்தில் எடின்பரா சென்றுவிடலாம் என்கிற நினைப்பே எனக்கு மகிழ்வாக இருந்தது. இந்த நிலையம் இங்கிலாந்தின் வடக்கில் இருக்கும் பெரிய நிலையம். இங்கிலாந்தின் கடைசி எல்லை நகரம் என்று கூடச் சொல்லலாம். மிகுந்த சரித்திர முக்கியத்துவம் வாய்ந்த இந்த நகர் டைன் நதிக்கரையில் அமைந்துள்ளது. தொடர்வண்டி நகருக்குள் நுழையும் போதே வலதுபுறம் இந்த நதி பக்கவாட்டில் ஓடிவரும். இதன் கரையில் அமைந்துள்ள மிகுந்த கலையம்சம் கொண்ட பாலங்களும் நம் கண்களுக்கு விருந்தளிக்கும். பெரும்பாலான தொடர்வண்டி நிலையங்கள் ஒரே வடிவமைப்பில் தான் பிரிட்டன் முழுவதும் இருக்கும். அந்த பிரமாண்டமான இரும்புக் கூரைக்குள் தொடர்வண்டிகள் உள் நுழைவதும் வெளிவருவதும் பார்ப்பதற்கு பேரானந்தமாக இருக்கும். 1080ம் வருடம் இராபர்ட் என்ற அரசனால் கட்டப்பட்ட கோட்டையினைக் கொண்டு தான் இந்த நகரின் பெயரும் இன்று வரை அழைக்கப்படுகிறது. இந்நகர் கம்பளி உற்பத்திக்கு பெயர் போனது. கால மாற்றம் மற்றும் தேவையின் காரணமாக பின்னர் இங்கு நிலக்கரி அகழ்வு என்பது முதன்மை தொழிலாகி பின்னர் இன்று வரை பெரும் கப்பல் கட்டும் துறைமுகங்களைக் கொண்ட நகராக திகழ்கிறது. மேலும் இங்கு இரவு வாழ்க்கை என்பது மிகுந்த விசேசமிக்கதாகவும் இங்கு தயாரிக்கப் படும் பீர் (Newcastle Brown Ale ) பிரபலமானதாகவும் இருக்கிறது. சுற்றுச் சூழலுக்கான the first Carbon Neutral town என்று அறிவிக்கப்பட்ட நகரமும் இது தான். ஜனவரி-பிப்ரவரி மாதங்களில் நடைபெறும் சீன புத்தாண்டுக் கொண்டாட்டமும், மார்ச் மாதம் நடக்கும் அறிவியல் திருவிழாவும், ஏப்ரலில் நடைபெறும் பீர் திருவிழாவும், மே மாதத்தில் நடைபெறும் இசைத் திருவிழா மற்றும் சர்வதேச திரைப்பட விழாவும், ஜூன் மாதம் ஐரோப்பாவின் மிகப் பெரிய பயணக் கண்காட்சி (The Hoppings), ஜூலை மாதம் பிரிட்டனின் சுற்றுச்சூழல் திருவிழா மற்றும் "Family Fun Day" and "Carnival Day" போன்ற நிகழ்ச்சிகளும் என்று வருடம் முழுமைக்கும் நடக்கும் திருவிழாக்கள் இந்நகரை ஒரு பெரிய சுற்றுலா தளமாகவும், கேளிக்கை நகராகவும் மாற்றி இருக்கின்றன என்றால் மிகையில்லை.

   

இந்நகருக்கு நான் சென்றதில்லை ஓரிரு முறை தொடர்வண்டி மாறிய அனுபவம் தவிர. தொடர்வண்டி டைன் நதியின் மேல் கட்டப்பட்ட மிகப் பிரமாண்டமான பாலத்தினைக் கடந்து தான் நியூகாஸல் நிலையத்தினை அடையும். பார்க்க மிக அருமையாக ரம்மியமாய், ஒய்யாரமாய் டைன் நதி வடக்கு கடலை நோக்கிச் செல்லும் அழகே அழகு தான். வண்டி நிலையம் அடைந்து நிற்கவும் மீண்டும் மக்கள் கூட்டம் வந்து மொய்துக்கொள்ளவும் சரியாக இருந்தது. நான் இருந்த இருக்கையின் அருகில் இருந்த இடம் காலியாக இருந்தது இதுவரை. மெல்ல மக்கள் தங்களுக்கான இடங்களில் அமரவும், சிலர் காலியாக இருக்கும் இடங்கள் தேடி அமரவும் சற்று அவகாசம் எடுத்துக் கொண்டனர். எனது இருக்கையும் ஒருவரால் ஆக்கிரமித்துக் கொள்ளப்பட்டு மேலும் மக்கள் தங்களுக்கான இருக்கையை பிடிக்க முடியாமலும் நிற்கவும் ஆரம்பித்திருந்தனர். தொடர்வண்டி மெல்ல தனது பயணத்தினைத் தொடங்கவும் வெளியே மழையும் பனியும் கலந்த கலவையாக வானம் பொழியத் தொடங்கியது. நானிருந்த அமைதிப் பெட்டி மக்களின் ஆக்கிரமிப்பால் அதன் அமைதியை இழந்து சராசரிப் பெட்டியாகியிருந்தது. புறப்பட்ட சற்று நேரத்திற்கெல்லாம் 'தொடர்வண்டி  இன்னும் 15 நிமிடங்களில் இருப்புப் பாதை செப்பனிடும் பணி காரணமாக தொடர்வண்டி நிறுத்தப் படும் என்றும், அது சரிசெய்யப் பட்டு 30 நிமிடங்களில் மறுபடியும் பயணம் தொடரும்' என்றும் அறிவிக்கப் பட்டது. சரி 30 நிமிடம் தானே என்ன‌வாகி விடப் போகிறது என்று என் மடிக் கணிணியைத் திறந்து பிரிட்டன் ஓட்டுநர் உரிமம் பெறும் தேர்வுக்குப் படிக்க ஆரம்பித்தேன். தொடர்வண்டியின் வேகம் படிப்படியாகக் குறைந்து நிற்க ஆரம்பித்தது. நானும் படிப்பதில் தீவிரமாக கவனம் செலுத்தத் தொடங்கினேன். வெளியில் மழை நின்று பனிப் பொழிவு மிகுந்த காற்றுடன் தொடங்கியிருந்தது. பக்கத்தில் இருந்த பெரியவர் என் கவனம் கலைக்க 'ஓட்டுநர் உரிமம் பெறவா?' என்றார். நானும் அப்போது தான் அவரின் முகத்தினைப் பார்த்தேன், நல்ல பெரிய மீசை உதட்டில் சிநேகமான புன்னகை என்று சட்டென்று கவனம் ஈர்த்தார். நான் 'ஆம் ஒரு முறை முயற்சிக்கலாம் என்று பார்க்கிறேன்' என்றேன்.



6 May 2012

கற்றது கைமண் அளவு- 06/05/2012


பிறந்த தினம்:

     
“என் குழந்தை பிறக்கும் போது அந்த குழந்தைக்கு தொட்டில் இல்லை. என் குழந்தை இறக்கும் போது அந்த குழந்தைக்கு சவப்பெட்டி கூட வாங்க முடியவில்லை"

- சரித்திரத்தில் நீங்கா இடம்பிடித்த இந்த வார்த்தைகளுக்கு சொந்தக்காரரின் பெயர் ஜென்னி.

மிகப்பெரும் செல்வந்த குடும்பத்தில் பிறந்தாலும் தான் வயப்பட்ட காதலுக்காக தான் பெற்றெடுத்த பிள்ளைகளுக்கு பால்கொடுக்க முடியாமல் ரத்தத்தைக் கொடுக்க வேண்டிய கொடுமைக்கு ஆளான இந்தப் பெண்மணியின் கணவர்தான் உலகையே உலுக்கிய மாமேதை!

இந்த ஜென்னியின் பொறுமையும் சகிப்புத் தன்மையும்தான் உழைத்து உழைத்து ஓடாய் தேய்ந்து.. முதுகெலும்பு ஒடியப் பாடுபட்டு பாடுபட்டு முதுகெலும்பே அற்றுப் போன உழைக்கும் வர்க்கத்தின் கைகளில் ஆயுதம் ஏந்த வைத்த "மார்க்சியம்" எனும் தத்துவத்தை பிரசவிக்க அடித்தளமாக இருந்தது!

மார்க்சியத்தின் தந்தை கார்ல் மார்க்ஸின் மனைவிதான் ஜென்னி!

தன் வீட்டுப் பொருளாதாரம் சுழியமாகிப் போன நிலையில் உலகத் தொழிலாளர்களின் உரிமைப் புரட்சிக்கு சுழிபோட்டவர் கார்ல் மார்க்ஸ்.. இன்று அவரது பிறந்த நாள்! (மே 5)

தொழிலாளியின் உழைப்பு, அதற்கு கொடுக்கும் விலை, அது செல்லும் பாதை, அதனால் சமுதாயத்தில் எப்படியான மாற்றங்கள் நிகழ்கின்றன? என்பதையெல்லாம் தம் வறுமையையும் பொருட்படுத்தாமல் ஆராய்ந்து ஆராய்ந்து "மார்க்சியம்" எனும் தத்துவத்துக்கு மூலவேராக "மூலதனம்" எனும் பெருநூலைக் கொடுத்தவர் காரல்மார்க்ஸ்!

பிரான்சுக்கும் ஜெர்மனிக்கும் இடையேயான ரைன் நதிக்கரையோரத்தில் யூத மதத்தில் 1818-ம் ஆண்டு மே 5-ம் நாள் பிறந்தார் மார்க்ஸ்! படிப்பை முடித்த கையோடு ரைன் கெஜட் எனும் பத்திரிகையில் சேர்ந்தார்... பத்தே மாதத்தில் அதன் ஆசிரியரானார்! அவரது கட்டுரைகள் ஜெர்மனி மக்களுக்கு உதயசூரியனை முன்னிறுத்தியது!

ஏடும் எழுதுகோலும் எடுத்தாலே சிறைவாசம் என்ற அடக்குமுறையை எதிர்நோக்கிய கார்ல் மார்க்ஸுக்கு கரம் கொடுத்தவர் ஏங்கெல்ஸ்! இந்த தோழர்கள்தான் இன்றும் பெயரைக் கேட்டாலே சிலிர்க்க வைக்கும் "கம்யூனிஸ்டுகளின்" காட் பாதர்கள்!

நாடு கடத்தப்பட்ட காலங்களிலும் கூட தன் சிந்தனையை இழந்துவிடவில்லை! வீட்டில் பிள்ளைகளும் மனைவியும் வறுமையின் கோரப் பிடியில் உயிரிழக்க.. தாமோ மரணத்தின் விளிம்பில் நிற்க.. அந்தக் காலத்தில்தான் காலப்பொக்கிஷமான "மூலதனம்" என்ற நூலை எழுதி முடிக்கிறார் கார்ல் மார்க்ஸ்.

உழைப்பையே மூலதனமாகக் கொண்டு வாழும் தொழிலாளர்களை மூலதனமாகக் கொண்டு முதலாளி வர்க்கம் அவர்களையே சுரண்டும் கொடூரங்களை அ, ஆனா பாடம் எடுப்பதுபோல மூலதனத்தில் பகிரங்கப்படுத்தியவர் மார்க்ஸ்

மார்க்ஸ்-ஏங்கெல்ஸின் வரலாற்று நூல்களே இன்றைய இடதுசாரி உலகத்துக்கு ஆணிவேர்! இவர்களது தத்துவங்களை ஏந்தியவர்கள்தான் லெனினும் மாவோவும்! இவர்களுக்கே தொடர்பில்லாத தேசங்களில்தான் இவர்களது லட்சியங்கள் நிறைவேறி இருக்கின்றன!

மாமேதை மார்க்ஸின் சிந்தனைகள் நூற்றாண்டுகளைக் கடந்தும் விடுதலையை நேசிக்கும் எந்தத் தலைமுறையும் கையில் ஏந்தக் கூடிய புரட்சிகர ஆயுதமாகவே இருக்கும்!

நன்றி:தட்ஸ்தமிழ்

==========================================================================================

சம்பவம்:

நேற்று சிறிது உடல்நலக் குறைவு காரணமாக அவசர சிகிச்சைப் பிரிவிற்கு இரவு 12 மணிக்குச் செல்ல வேண்டிய கட்டாயம் ஏற்பட்டது. என் வீட்டிலிருந்து சிறிய‌ தொலைவு என்பதால் நடந்தே சென்றேன். வாடகை வாகனமும் கிடைக்கவில்லை எனவே நடந்து சென்று ஆலோசனை பெறச் சென்றேன். அவசரச் சிகிச்சை நகரின் மையப்பகுதியில் இருப்பதால் எப்போதும்  அந்தப் பகுதி முழுவதும் கலகலப்பாக யுவன்களும் யுவதிகளும் நிறைந்திருக்கும். நான் செல்லும் போதே அரை நிர்வாணப் பெண்களால் அந்தப் பகுதி முழுவதும் நிறைந்திருந்தது. சுற்றிலும் இருக்கும் பஃப்களிலும் இரைச்சலான இசை வழிந்து கொண்டிருந்தது. பகலில் இருக்கும் அந்தப் பகுதி முற்றிலும் உருமாறி இருந்தது. தீடீரென ஒரு பெண் சாலையின் மையப்பகுதிக்குச் சென்று தன் ஆடையைத் தூக்கி சிறுநீர் கழிக்க ஆரம்பித்தார். சாலையில் சென்ற கார்கள் இவரின் வருகையால் ஸதம்பித்து நிற்க அந்தப் பெண் எதைப் பற்றிய உணர்வும் அற்று நின்றுகொண்டு ஆனந்தமாக தன் வேலையைச் செய்துகொண்டிருந்தார். நான் அதிர்ச்சியில் உறைந்து போனேன். என் உடல் நலக் குறைவு சட்டென்று சரியானது போன்ற மாயை எனக்குள் கணப் பொழுதில் வந்து சென்றது. ஒரு வழியாக தர்ம தரிசனம் முடிந்து என் மருத்துவரைப் பார்த்துத் திரும்பினேன். எனக்குள் அந்தக் காட்சி மீண்டும் மீண்டும் ஓடிக் கொண்டே இருந்தது. வீட்டிற்கு வந்தவுடன் என்மனைவியிடம் இதனைப் பற்றிச் சொன்னேன், "இதப் பாக்கத் தான் நடுராத்திரில போனிங்களா" என்று என்னை நக்கலாகப் பார்த்தார்.


==========================================================================================

ஒரு திரைப்படம்:

காதல் திரைப்படம் பார்த்த போது அதன் தாக்கம் வெகு நாட்கள் மனதுக்குள் இருந்தது. எனவே பாலாஜி சக்திவேலின் வழக்கு எண் :18/9 திரைப்படத்தினைப் பார்க்கும் ஆவல் எனக்குள் அதிகமாக இருந்தது. படத்தினைப் பற்றிய எல்லா வலைப்பூக்களிலும் வந்திருந்த விமர்சனங்களும் என் தம்பி படம் பார்த்துச் சிலாகித்ததும் எனக்குள் படத்தினைப் பார்க்கும் ஆவலை அதிகப்படுத்தியிருந்தன. எனவே நேற்றே இணையத்தில் தரைவிறக்கம் செய்து (என்ன செய்யுறது இங்க ரிலீஸ் ஆகலயே..) பார்த்தேன். பார்க்கத் தொடங்கிய சில நிமிடங்களில் தனக்குள் இழுத்துக் கொண்டது திரைப்படம். இரண்டாம் பகுதியின் கதையும் முதல் பகுதியின் கதையும் மெல்ல இரண்டு சலனமற்ற ஆறுகள் கலப்பதைப் போன்று வடிக்கப்பட்ட திரைக்கதையும் என்னைத் திரைப்படத்துடன் கட்டிப் போட்டது. நீண்ட நாட்களுக்குப் பின்னர் ஒரு திரைப்படம் பார்த்த அனுபவத்தினைக் கொடுத்தது. கவிதையாய் மெல்ல மனதினை அழுத்தும் முடிவும் ஒரு முழுமையினைத் தந்தது. மிக நல்ல பெயரினை தமிழ் சினிமாவிற்கும், இயக்குநருக்கும் பெற்றுத்தரும். இந்திய சினிமாவின் 100வது வருடம் தொடங்கிய நாளில் வெளியான மிகச்சிறந்த படைப்பு.


==========================================================================================

துளிகள்:

இங்கிலாந்தின் மழையளவு எப்போதையும் விட அதிகமாக பெய்து ஆறுகளில் எல்லாம் வெள்ளம். இதனை கண்கூடாகவும் பார்க்க முடிந்தது. மேலும் மே மாதத்தில் வழக்கதை விட குறைவான வெப்பம் வேறு. கடந்த இரண்டு நாட்களாக மழை இல்லை ஆனால் குளிரும் கூடவே காற்றும் என்று கொஞ்சம் வெறுப்பாக இருக்கிறது வெளியில் செல்ல.

ஒரு வழியாக மாவோயிஸ்ட்டுக்கள் கலெக்டரை விடுவித்துவிட்டார்கள் 13 தினங்களுக்கு பின்னர். "நான் களைப்பாக இருக்கிறேன்.கடத்தல்   விவகாரத்தை பற்றி பேசுவதற்கு முன்பு,வீட்டுக்கு சென்று குடும்பத்தினரை பார்க்க   விரும்புகிறேன்" என்று கூறியிருக்கிறார். என்ன டீலிங் என்பது தான் தெரியவில்லை.

இனி இந்திய ரயில்கள் பற்றிய அறிவிப்புகள் மற்றும் எங்கு சென்று கொண்டிருக்கின்றன என்கிற தகவல்கள் எல்லாம் இந்த இணைய தளத்தில் காணலாம் http://www.trainenquiry.com/.

வன்னியர்களுக்கு தனி இடஒதுக்கீடு அளிக்க வலியுறுத்தி போராட்டம் நடத்த பாட்டாளி மக்கள் கட்சி முடிவு செய்துள்ளதாக அதன் நிறுவனர் டாக்டர் ராமதாஸ் அறிவித்துள்ளார். இதற்காக அவர் ஒரு வருடம் சிறையில் இருக்கவும் போகிறாராம். பாத்து சார் ரொம்ப நாள் வைச்சிரப் போறாங்க....


==========================================================================================


இந்த வார ஆவணப்படம்.



==========================================================================================

சில பாடல்கள் நம்மையும் அறியாமல் நமக்குள் ஒட்டிக் கொள்ளும். இந்தப் பாடலும் அது போலத் தான்.....



==========================================================================================

29 April 2012

கற்றது கைமண் அளவு- 29/04/2012

துளிகள்:

பாவேந்தர் பாரதிதாசனின் பிறந்த தினம் இன்று. புதுவையில் பெரிய வணிகராயிருந்த கனகசபை முதலியார், இலக்குமி அம்மாள் இவர்களின் அருந்தவப் புதல்வன். கவிஞரின் இயற்பெயர் கனகசுப்புரத்தினம். தமிழால் உணர்ச்சி கூட்டிய மாகவிஞன். இவரின் வாழ்க்கைக் குறிப்பு படிக்க http://www.pudhucherry.com/pages/paavendar1.html


இந்தாண்டு இங்கிலாந்து முழுவதும் வறட்சிப் பிரதேசமாக அறிவித்தார்கள் ஒரு மாதத்திற்கு முன்பு. அறிவித்த தினத்திலிருந்து கிட்டத்தட்ட எல்லா நாளும் மழைதான்.  இது சாதாரணமாகப் பெய்யும் மழை அளவைவிட அதிகம் என்கிறது புள்ளிவிபரம். சென்றவருடமும் மத்திய இங்கிலாந்து வறட்சிப் பிரதேசமாக அறிவிக்கப்பட்டது. எனக்கு என்னவோ ஒரு வேறுபாடும் தெரிவதில்லை. இப்படி பசேலென்று இருக்கும் இந்தப் பகுதியே வறட்சிப் ப்குதி என்றால் எங்க ஊரை என்னனு சொல்லுறது....

யுனிவர்சல் ஸ்டுடியோ சென்றவாரம் நூற்றாண்டைக் கொண்டாடியது. மிகச்சிறந்த பொழுதுபோக்குத் திரைப்படங்களைத் தந்தவர்கள் தந்துகொண்டிருப்பவர்கள். ஒரு சினிமாத் தயாரிப்பு நிறுவனம் நூறாண்டுகள் நிலைத்திருப்பது என்பது கொஞ்சம் கடினமான காரியம் தான் என்றாலும் அவர்களின் விளம்பர யுக்தியும், வியாபார நுணுக்கமும் தான் இவ்வளவு தூரம் அவர்களைக் கொண்டு செலுத்தியிருக்கிறது.

நடிகை ரஞ்சிதாவின் நித்தியானந்தா மதுரை ஆதினமாம். 1500 ஆண்டுகள் பழமை வாய்ந்த மதுரை ஆதினத்திற்கு இருக்கும் சொத்துக்கள் நாம் நினைத்துக் கூடப் பார்க்க முடியாத அளவிற்கு அதிகம். மதுரை ஆதினம் மிகப் பெரிய காமெடியனிடமிருந்து காமநெடியனின் வசம் வருகிறது...

சச்சின் நம்ம ஊர் நடிகர்கள் போல அரசியலுக்கு வந்துட்டாரு. என்னதான் சம்பாரிச்சாலும் கட்டிக் காக்க வேண்டுமா இல்லையா என்பது போலவும், அவர் மட்டும் என்ன கடவுளா அற்பமான மனுசப் பிறப்பு தானே என்றும் கருத்துக்கள் இறக்கை கட்டிப் பறக்கின்றன. ஊருல கல்யாணம்னா மாப்பிள்ளையும் நான் தான், ஊருல எழவுன்னா பொணமும் நான் தான், ஆக மொத்தம் மாலையும் மரியாதையும் எனக்குத்தான்...


இராணுவத் தளபதியின் தகிடுதத்தங்களை எல்லாம் தாண்டி இந்தியா, 5,000 கி.மீ. வரையிலான இலக்குகளைத் தாக்கவல்ல 'அக்னி 5’ ஏவுகணையைச் சோதனை செய்திருக்கிறது. இந்த ஏவுகணை சீனாவை மனதில் வைத்தே உருவாக்கப்பட்டது என்பதால், அமெரிக்க - ஐரோப்பிய நாடுகள் பெரிதாக எதிர்ப்பு தெரிவிக்கவில்லை. ''உண்மையில் 'அக்னி -5’ ஏவுகணை 8,000 கி.மீ. தூரம் பாய வல்லது. ஐரோப்பாவுக்கும் இதனால் ஆபத்து!’ என்று அலறுகிறது சீனா. இதைக் கண்டுகொள்ளாத இந்திய விஞ்ஞானிகள் அடுத்தகட்டமாக ஏ-6 எனப்படும் 10,000 கி.மீ. தூரம் பறந்து சென்று ஒரே நேரத்தில் பல பகுதிகளைத் தாக்கக்கூடிய சூப்பர் ஏவுகணையை உருவாக்கும் முயற்சியை ஆரம்பித்திருக்கிறார்கள். நல்லா அடிச்சுக்கிட்டு சாகடிங்க (மக்களை)...(நன்றி:விகடன்)


_________________________________________________________________________________________________________ 


அணையப் போகும் விளக்கு பிரகாசமாக எரியும் என்பதற்கு கலைஞரின் சென்ற வார பேச்சுக்கள் ஒரு எ.கா. கலைஞரின் சமீபத்திய காமெடிகளுக்கு சீமான் அவர்களின் பதில் காணொளி வடிவில்....


_________________________________________________________________________________________________________ 

இந்தவார ஆவணப் படம். புத்தரின் வரலாறு பற்றியது. மிகவும் சுவாரசியாமாக இருந்தது...நீங்களும் பாருங்கள்...



_________________________________________________________________________________________________________ 

23 April 2012

ஏப்ரல் 23 உலக புத்தகம் மற்றும் பதிப்புரிமை தினம


நன்றி: விகடன்.காம்

ஆண்டுதோறும் ஏப்ரல் 23-ம் தேதி உலகப் புத்தகம் மற்றும் பதிப்புரிமை தினமாக  (WORLD BOOK AND COPYRIGHT DAY) கொண்டாடப்படுகிறது.

ஐக்கிய நாடுகள் சபையின் ஓர் அங்கமான யுனெஸ்கோ சார்பில் 1996, ஏப்ரல் 23-ம்  தேதி ஜெனிவாவில் உலகப் பதிப்பாளர்கள் மாநாடு நடந்தது. அப்போது, ஆண்டுதோறும்  ஏப்ரல் 23-ம் தேதியன்று 'உலகப் புத்தக தினம்’ கொண்டாட தீர்மானம்  நிறைவேற்றப்பட்டது. ஏப்ரல் 23-ம் தேதி ஆங்கில நாடக இலக்கிய மேதையான  ஷேக்ஸ்பியர் பிறந்த நாள். அவரை போற்றும் விதமாக இத்தினம் கொண்டாடப்படுகிறது.

புத்தகங்களின் அவசியத்தை அனைவரும் அறிந்துக்கொள்ள ஐந்து விதமான  நடைமுறைகளை அனைவரும் பின்பற்ற வேண்டும் என யுனெஸ்கோ சொல்லியுள்ளது.


1. பதிப்பகங்கள்

பதிப்பகங்கள் புத்தக கண்காட்சிகளை நடத்த வேண்டும். மலிவான விலையில்  புத்தகங்களை வெளியிட வேண்டும். மாணவர்கள், நோயாளிகள் மற்றும் கைதிகளுக்கு  இலவசமாக புத்தகங்கள் வழங்க வேண்டும்.

2. தொழிலதிபர்கள்

புத்தக தினத்தன்று பணியாளர்களுக்கும், நண்பர்களுக்கும், உறவினர்களுக்கும்  தொழிலதிபர்கள் பரிசளிப்பதை வழக்கமாக கொள்ள வேண்டும். தொழிற்சாலையில் சிறு  நூலகங்களைத் தொடங்கி, பணியாளர்களை படிப்பாளர்களாக மாற்ற வேண்டும். கல்வி  அறிவு விழிப்புணர்வு கூட்டத்தை நடத்த வேண்டும்.

3. நூலகங்கள் மற்றும் கல்வி நிறுவனங்கள்

சிறுவர் சிறுமியர்களிடையே வாசிக்கும் பழக்கத்தை ஏற்படுத்த அவர்களுக்கு நூலகங்களும்  கல்வி நிறுவனங்களும் போட்டிகள் வைக்க வேண்டும். மேலும், மாணவர்கள்,  பெற்றோர்கள் பங்கேற்கும் நிகழ்ச்சிகள் நடத்த வேண்டும். இளம் எழுத்தாளர்களிடையே  போட்டி நடத்த வேண்டும்.

4. பொதுமக்கள்

நூலகத்திற்கு சென்று பொதுமக்கள் புத்தகங்களை படிக்க வேண்டும். வீட்டுக்கொரு சிறிய  நூலகத்தை ஆரம்பிக்க வேண்டும். நண்பர்கள், உறவினர்கள், அன்பானவர்களுக்கு  நூலை பரிசளிப்பதை வழக்கமாக ஏற்படுத்திக் கொள்ள வேண்டும்.

5. பத்திரிகைகள்

புத்தகங்கள் வாசிக்கும் பழக்கத்தைத் தூண்டும் விதத்தில் வாசகர்களை பத்திரிகைகள்  ஊக்கப்படுத்தவேண்டும்.

புத்தக தினத்துக்காக யுனெஸ்கோ ஒரு பொன்மொழியையும் வெளியிட்டு உள்ளது.  'நீங்கள் நேசிக்கும் ஒருவருக்கு உளமார ஒரு புத்தகம் பரிசளியுங்கள்’ என்பதே அது.

இந்தியா சுதந்திரம் அடைந்து 60 ஆண்டுகளில் கல்வி கற்றோரின் எண்ணிக்கை  பெருமளவில் வளர்ச்சி பெற்றுள்ளது. 1947-ம் ஆண்டு 90 சதவிகிதமாக இருந்த  கல்லாதவர்கள் எண்ணிக்கை 2000-ல் 40 சதவிகிதமாக குறைந்தது.


2011-ல் கற்றோரின் சதவிகிதம் சதவிகிதம் 74.04 ஆக அதிகரித்துள்ளது.  ஆனால்,  கல்வியறிவு வளர்ச்சி வளர்ந்த அளவுக்கு வாசிக்கும் பழக்கம் தமிழர்களிடையே போதிய  அளவுக்கு வளரவில்லை.

அதே நேரத்தில், தமிழரிடையே நூல் வாசிப்புத் திறன் முற்றிலும் குறைந்துவிட்டது என  ஒரேயடியாகக் கூறிவிட முடியாது. ஏனெனில், 15 ஆண்டுகளுக்கு முன்பு வெளியான  நாளிதழ்கள், வார இதழ்கள், இருவார இதழ்கள் ஆகியவற்றின் எண்ணிக்கை இப்போது  பத்து மடங்குக்கு மேல் பெருகியுள்ளது. வாசிப்போரின் எண்ணிக்கை நாளுக்கு நாள்  கூடிக்கொண்டே இருக்கிறது. இது பாராட்டத்தக்க விஷயமாகும்.

யுனெஸ்கோ உலக மக்களின் வாசிப்பு அளவை கணக்கிட்டது. அது உலக மக்களின்  சராசரி வாசிப்பு ஆண்டுக்கு 150 பக்கங்கள் என்றும், இந்திய மக்களின் வாசிப்பு 32  பக்கங்கள் என்றும் குறிப்பிடுகிறது. 32 பக்கங்கள் கூட சிறந்த நூல்களைத்  தேர்ந்தெடுத்துப் படிக்கப்பட்டவை அல்ல. அவற்றில் பாட நூல்களும் பத்திரிகைகளும்  அடங்கும் என்கிறது அந்தத் தகவல்.

பெரும்பாலும் எந்த ஒரு புத்தகமும், இரு பதிப்புக்கு மேல் வெளியிடப்படுவது என்பது  அரிதாக இருக்கிறது. புத்தகம் வாங்கும் மற்றும் படிக்கும் ஆர்வம் போதிய அளவுக்கு  இல்லாததால் மறுபதிப்புகள் வெளியாவதில்லை.

உலக புத்தக தினத்தையட்டி சென்னை எழும்பூரில் உள்ள கன்னிமாரா நூலகத்தில் அரிய  புத்தக கண்காட்சிக்கு ஏற்பாடு செய்யப்படுகிறது. இதில், மிகவும் பழமை வாய்ந்த அரிய  புத்தகங்கள் கண்காட்சிக்கு வைக்கப்படுகின்றன.

பழைய சென்னை மாகாண வரலாறு, செயின்ட் ஜார்ஜ் கோட்டை வரலாறு, இந்திய  மக்கள்தொகை,  தமிழ் இலக்கியக் களம், அந்த கால மாவட்ட நிர்வாகமுறை, அரிய  புகைப்படங்களுடன் இந்திய சுதந்திர போராட்ட வரலாறு, பழங்காலத்து ஓவியங்கள்  உள்ளிட்டவை தொடர்பாக 17-ம் நூற்றாண்டு, 19-ம் நூற்றாண்டு, 20-ம் நூற்றாண்டில்  வெளியிடப்பட்ட அரிய புத்தகங்கள் கண்காட்சியில் இடம் பெறுகின்றன. அளவிலும்,  எடையிலும் அதிகமாக இருந்த சில புத்தகங்களும் இடம் பெறுகிறது.

நல்ல புத்தகத்தை சிறந்த ஆசான் எனலாம்.

புத்தகங்கள் பற்றிய சுவைகள்:

* புத்தகங்கள் ஒருவரின் கற்பனைத்திறன் வளரப் பயன்படுகின்றன.

* புத்தகங்கள் படிக்கும் போது மகிழ்ச்சி, சோகம், ஆனந்தம் போன்ற பல்வேறு  உணர்வுகள் நமக்கு ஒரு சேர ஏற்படுகின்றன.

* புத்தகங்கள் நம்மைத் அவற்றின் காலத்திற்கு இட்டுச் செல்கின்றன.

* மாவீரன் நெப்போலியன் போர்க்களத்திற்குக் கூட புத்தகங்களை எடுத்து செல்வதை  வழக்கமாக கொண்டிருந்தான்.

* நேரு, அறிஞர் அண்ணா, கலைஞர் கருணாநிதி போன்ற தலைவர்கள் புத்தகப்  பிரியர்கள்.


இன்னொரு காரணம்..!

சுமார் 400 ஆண்டுகளுக்கு முன் வாழ்ந்த ஸ்பெயின் நாட்டு எழுத்தாளர் மிகேல் டி  செர்வான்டீஸ் சாவெத்ரா (Miguel de Cervantes Saavendra)மறைந்த தினத்தை  போற்றும் வகையில் உருவாக்கப்பட்டது இந்தத் தினம் என்று சொல்லப்படுவதும் உண்டு.  ஷேக்ஸ்பியர் காலத்தில் வாழ்ந்த மிகேல் புதினங்கள், நாடகங்கள், கவிதைகள் என்று  இலக்கியத்தில் புதுமைகள் படைத்தார்.                                                                                                                          இவரின் டான் கொய்ஜொடி டி லா மஞ்சா (Don quijote de la Mancha) நூல்  மிகவும் புகழ்பெற்றது. இதில் வரும் டான் கொய்ஜொடி ஆகாய கனவுகளும் ஏக்களும்  நிறைந்த சாதாரண மனிதன். அவன் இல்லாத தேசம் ஒன்றுக்கு தனை ராஜாவாக  நினைத்துக் கொண்டு செயல்படுவதுதான் கதை. இதை வீரம், சோகம், காதல் ரசம்  சொட்டச் சொட்டவும், நகைச்சுவையாகவும் எழுதி இருக்கிறார்.  


ஜூன் 3 - உலக தமிழ் புத்தக தினம்

தமிழக முதலமைச்சராக இருந்த மு.கருணாநிதியின் பிறந்த நாளான ஜுன் மூன்றாம்  தேதியை, உலக புத்தக தினமாக (World Tamil Book Day) தமிழ் பதிப்பாளர்கள்  சங்கம் முடிவு கொண்டாடி வருகிறது.

தமிழ் வளர்ச்சிக்காக கருணாநிதி ஆற்றியுள்ள பங்கை கருத்தில் கொண்டு இந்த முடிவு  மேற்கொள்ளப்பட்டது.  தமிழ் மொழியை செம்மொழியாக ஆக்கியதில் கருணாநிதி  வெற்றி பெற்றுள்ளார். பொது நூலகங்களுக்கு வாங்கப்படும் தமிழ் நூல்களின்  எண்ணிக்கையை 600-லிருந்து 1000 ஆக உயர்த்தினார்.

ஒரு கோடி ரூபாயை தன் சொந்த நிதியிலிருந்து வழங்கி அதன் மூலம் கிடைக்கும் வட்டி  தொகையில் 5 தமிழ் எழுத்தாளர்களுக்கு ஆண்டு தோறும் ஒரு லட்ச ரூபாய் வழங்க  ஏற்பாடு செய்திருக்கிறார்.

நடப்பு 2012 ஆம் ஆண்டு பரிசுக்கு உரியவர்களை டாக்டர் இ.சுந்தரமூர்த்தி, பேராசிரியர்  ராமகுருநாதன், பாலரமணி ஆகியோர் கொண்ட குழு தேர்வு செய்துள்ளது.

அதன் விவரம்:

1. தமிழ் உரைநடை இலக்கியம் -  மா.ர.போ.குருசாமி

2. தமிழ் கவிதை இலக்கியம் -  சிற்பி பாலசுப்பிரமணியம்

3. தமிழ் நாடக இலக்கியம் - கே.பி.அறிவானந்தம்

4. தமிழ் புனைவு இலக்கியம் - விக்கிரமன்

5. ஆங்கில இலக்கிய எழுத்தாளர் - பிரேமா நந்தகுமார்

6. பிற இந்திய மொழி எழுத்தாளர் (கொங்கணி மொழி இலக்கியம்) - பிரான்சிஸ் டி  சவ்சா

இந்த எழுத்தாளர்களுக்கு தலா ஒரு லட்சம் ரூபாய் ரொக்கத்துடன், வெள்ளிக் கேடயம்,  பொன்னாடை ஆகியவையும் வழங்கப்படும். பரிசளிப்புவிழா, இன்று மாலை 6 மணிக்கு  சென்னை ராஜா அண்ணாமலை மன்றத்தில் நடைபெறுகிறது.விழாவுக்கு தொழிலதிபர்  நல்லி குப்புசாமி செட்டியார் தலைமை தாங்குகிறார்.தி.மு.க. பொதுச்செயலாளர்  அன்பழகன் பரிசுகளை வழங்குகிறார்.

22 April 2012

கற்றது கைமண் அளவு - 22/04/2012

ஏப்ரல் 20 எனது பிறந்த தினம். இந்த முறை குடும்பத்தினரைத் தாண்டி முகநூலிலும், தொலைபேசியிலும், நேரிலும் என்று வாழ்த்துச் சொன்னது மிகவும் நெகிழ்ச்சியாக இருந்தது. அனைவருக்கும் நன்றி. சென்ற வாரம் முழுவதும்கடுமையான வேலைப் பளு காரணமாக எழுத இயலவில்லை. பிறந்த தினத்தின் அன்றும் அப்படியே...ஆனால் முகநூல் மட்டும் பார்த்து வாழ்த்துக்களுக்கு நன்றி சொன்னேன். நான் பிறந்த தினத்தில் தான் இந்த உலகை மாற்றிய (ஏதோவொரு வகையில்) பெருமக்கள் பிறந்த தினம். இதில் பெருமைப் பட்டுக்கொள்ளவும், இவர் போல வேண்டாம் என்று சொல்லவும் என இரண்டு பட்டியல் உள்ளது. சில எனக்குப் பிடித்தவை இங்கே....

570 – முகமது நபி, இஸ்லாம் மத தாபகர் (இ. 632) (உறுதிப்படுத்தப் படவில்லை) பிறந்த நாள்
1889 – அடொல்ஃப் ஹிட்லர், ஆஸ்திரியாவில் பிறந்து ஜெர்மனி யை ஆண்ட சர்வாதிகாரி (இ. 1945) பிறந்த நாள்
1902 – பியேர், மற்றும் மேரி கியூரி ரேடியம் குளோரட்டைத் தூய்மைப்படுத்தினர்.
1945 - இரண்டாம் உலகப் போர் கிட்டத்தட்ட முடிவுக்கு வந்த தினம்.
1972 – அப்போலோ 16 சந்திரனில் இறங்கியது.

நான் பிறந்த நாளில் பிறந்தவர்களை நான் இதுவரை சந்தித்தது இல்லை. ஆனால் என் அலுவலக நண்பர் ஒருவர் இந்த நாளில் தான் பிறந்தேன் என்று சொன்னது எனக்கு மிகவும் மகிழ்ச்சியாகவும் இருந்தது. இவற்றை எல்லாம் தாண்டி 2011 வேதியலில் நோபல் பரிசு பெற்ற பேரா. டான் செக்மான் (Dan Shechtman) அவர்களுடன் புகைப்படம் எடுத்துக் கொண்டது என்பது மிகவும் மகிழ்வான தருணமாக அமைந்தது. Dan Shechtman அறிவியலில் ஒரு கலகக் காரர் என்றே சொல்லலாம். இயற்பியலில் படிகங்கள் என்பதற்கு ஒரு விளக்கம் உண்டு, 'ஒரு அணு அல்லது மூலக்கூறு ஒரு சீரான இடைவெளியில் அடுக்கப்பட்டு எந்தப்பக்கத்திலிருந்து பார்த்தாலும் ஒரே அளவுடையதாக இருக்கும்' என்பது. எடுத்துக்காட்டாக,  நூற்றுக் கணக்கான கனசதுரங்களை சீரான இடைவெளியில் அடுக்கிவிட்டு எங்கிருந்து பார்த்தாலும் ஒரே தோற்றத்ததினை தரும் அல்லவா மேலும் மிகவும் துள்ளியமாக ஒரு கனசதுரத்தை மட்டும் குறிப்பிட்ட அளவு சுழற்றும் போது எந்த ஒரு மாற்றமும் இருக்காது தானே. இந்த நிலையினை மிகத் துள்ளியமாக x-கதிர்கள் கொண்டும், மிக நுண்ணிய உருப்பெருக்கி கொண்டும் அளவிட்டு 1, 2, 3, 4 மற்றும் 6 முறை சுழற்றும் போது மட்டும் தான் அவை தனது பழைய நிலையினை அடையும் என்று இயற்பியலார்கள் கருதினர். 5 முறை சுழற்றும் போதும் 6 மேல் சுழற்றும் போதும் இவை தனது துவக்கப் புள்ளியை அடைவதில்லை எனவே அவை படிகங்களாக இருப்பதில்லை. ஆனால், Dan Shechtman 5 முறை சுழற்றும் போதும் இவை தனது நிலையிலிருந்து மாறுவதில்லை மாறாக இவை ஏறத்தாழ படிகங்களாகவே உள்ளன என 1982 ஆம் ஆண்டு தனது ஆய்வில் தெரிவித்தார். இது காலங்காலமாக பின்பற்றிய நம்பிக்கைக்கு முற்றிலும் எதிரானது என்று அவரைத் தனது பல்கலைக் கழகம் வேலையிலிருந்து நீக்கியது. அவர் ஒரு அறிவியலாளர் அல்ல என்று ஒதுக்கி வைக்கப்பட்டார். 12 ஆண்டுகள் கழித்து அவரின் கண்டுபிடிப்பு அங்கீகரிக்கப்பட்டு இன்று நோபல் பரிசு வழங்கிக் கவுரவிக்கப்பட்டுள்ளார். அவரின் எழுச்சிமிக்க உரையும் அதனை அவர் முடித்தவுடன் பார்வையாளர்கள் கிட்டத்தட்ட விடாமல் பத்து நிமிடம் கைகளைத்தட்டியதும் மிகவும் நெகிழ்ச்சியாக இருந்தது.


அவரின் உரை ஊப்சலா பல்கலைக்கழகத்தில் நடந்தது.


_________________________________________________________________________________________________________ 


இளையராஜாவின் மயக்கும் இசையில் வெளியான இந்தப் பாடல் எப்போது கேட்டாலும் ஒரு மந்தகாசம் தொற்றிக் கொள்ளும்....


_________________________________________________________________________________________________________